छत्तीसगढ़ के इतिहास म पहली पइत पेश होइस पेपरलेस डिजिटल बजट

रायपुर, 09 फरवरी, 2024। छत्तीसगढ़ के विष्णुदेव साय सरकार के पहला बजट ऐतिहासिक रूप ले चिर स्मरणीय हो गे। वित्त मंत्री श्री ओपी चौधरी पेपर लेस बजट पेस करिन अऊ छत्तीसगढ़ के इतिहास के ये पहला डिजिटल बजट रहिस। एखर संगेच ए बजट के ब्रीफकेस घलोक छत्तीसगढ़ के लोक कला, लोक संस्कृति, युवा, महिला अऊ किसान अउ आधुनिकता के समावेश ल दर्शाइस।
वित्त मंत्री श्री ओ पी चौधरी ह आज विधानसभा म बजट ल जेन ब्रीफकेस म प्रस्तुत करिन वो काफी खास रहिस। ये ब्रीफ़केस छत्तीसगढ़ के आदिम जनजाति के पारंपरिक सुप्रसिद्ध ढोकरा शिल्प ल समेटे हे। जानबा हे कि हाले म प्रधानमंत्री श्री नरेंद्र मोदी ले ग्रीस के प्रधानमंत्री ल छत्तीसगढ़ के डोकरा कलाकृति भेंट करे रहिन जेखर से ए कला के पहिचान अंतर्राष्ट्रीय स्तर तक पहुंचे हे।
श्री ओपी चौधरी के बजट ब्रीफकेस म भारत माता अऊ छत्तीसगढ़ महतारी के फोटो रहिस जेन ये दर्शात रहीस कि विकसित भारत निर्माण म छत्तीसगढ़ प्रदेश के योगदान बहुत महत्वपूर्ण साबित होही। ब्रीफकेस म छत्तीसगढ़ शासन के लोगो जेमे धान के बाली हे, ये दर्शाथे कि ये किसान हितैषी सरकार हे अऊ किसान मन के हित ल सदैव प्राथमिकता म रखही।
ए ब्रीफकेस म छत्तीसगढ़ के मैप ल स्वर्णिम रूप म दर्शाए गए हे जेन ये बताथे कि सरकार सुशासन के संग छत्तीसगढ़ के युवा, महिला अउ किसान मन के आय म वृद्धि करे के उद्देश्य के संग काम करही अऊ छत्तीसगढ़ राज्य ल देश म एक स्वर्णिम राज्य के रूप मे स्थापित करही।
ए ब्रीफकेस म अमृतकाल के नींव के बजट लिखे हे जेन ये दर्शाथे कि केंद्र के सबो योजना मन के लाभ प्रदेश के जनता ल सरलग मिलत रहिही। एखर संगेच ब्रीफ़केस के पीछू GREAT CG लिखे हे जेन Guarantee, Reform, Economic Growth, Achievement, Technology, Сарех अउ Good Governance ल दर्शाथे।
वित्त मंत्री ओपी चौधरी के पहिली बजट के ए ब्रीफ़केस म छत्तीसगढ़ के विष्णुदेव सरकार के नीति अउ मंशा साफ़ झलकत हे जेन ये दर्शाथे कि ये सरकार मोदी के गारंटी ल पूरा करके सबके संग, सबके विकास, सबके विश्वास व सबके प्रयास के सिद्धांत म चलके छत्तीसगढ़ के जनता के विकास के प्रति पूरा प्रतिबद्ध हे।