परेवाडीह गौठान म महिला मन करत हें साग-भाजी के खेती

धमतरी, प्रदेश शासन के महत्वाकांक्षी सुराजी गांव योजना ले गौठान मन के संग गांव के महिला मन स्वावलम्बन कोति तेजी ले कदम बढ़ावत हें। एखर से एक कोति जिहां उंखर आय म बढ़ोतरी होवत हे, उहें दुसर कोति उमन म एक नवा आत्मविश्वास जागृत होय हे अऊ वो पूरा मनोयोग ले अपन काम ल आगू बढ़ाए म जुटे हें। धमतरी जिला के ग्राम परेवाडीह गौठान म स्वसहायता समूह के धमतरी ढाई एकड़ म सामुदायिक बाड़ी विकसित करके सब्जी के खेती करत हें।
धमतरी जिला के अर्जुनी-भखारा मुख्यमार्ग म ग्राम परेवाडीह म आदर्श गौठान बनाए गए हे, जेमां गायत्री स्वसहायता समूह के 15 महिला मन कई प्रकार के अंतरवर्तीय सब्जी के फसल लेवत हें। समूह के सचिव श्रीमती भारती साहू ह बताइस कि योजना के तहत करीबन साल भर पहिली ग्राम पंचायत ले 2.50 एकड़ खाली भूखण्ड सामुदायिक बाड़ी विकास बर देहे गीस, जेमां पहिली महात्मा गांधी राष्ट्रीय ग्रामीण रोजगार गारण्टी योजना के तहत जमीन समतलीकरण, गड्ढा निर्माण अऊ मिश्रित पौधरोपण कराए गीस। श्रीमती साहू ह बताइस कि सब्जीवर्गीय फसल मन के उन्नत पैदावार अऊ तकनीकी ज्ञान बर बड़ौदा आरसेटी ले समूह के महिला मन ल प्रशिक्षण घलोक देहे गीस। महिला समूह ह करजा लेके सब्जी के खेती शुरू करिस, जेमां 30 डिसमिल म करेला, 20-20 डिसमिल म बैंगन अऊ टमाटर, 25 डिसमिल म मूंगफली, 15 डिसमिल म कद्दू, 10-10 डिसमिल म अमारी, पटवा, लालभाजी संग गलका डोड़का के उत्पादन करे गीस। समूह ल अब तक 30 ले 35 हजार रूपिया के आमदनी हो गे हे। समूह के अध्यक्ष श्रीमती माधुरी साहू ह बताइस कि ए सब्जि मन के अलावा समूह के महिला मन अब वर्मी खाद के उत्पादन घलोक करे लगे हें।