छत्तीसगढ़ म लउहे-लउहे खोले जात हे परिवहन सुविधा केन्द्र: दलाल मन ले मिलही मुक्ति

रायपुर, छत्तीसगढ़ म परिवहन संबंधी सेवा मन ल आसान अऊ घर के तीर लाए बर तेजी ले परिवहन सुविधा केन्द्र खोले जात हे। एखर तहत प्रदेश म अब तक 219 परिवहन सुविधा केन्द्र के स्थापना हो गे हे।
जानबा हे कि मुख्यमंत्री श्री भूपेश बघेल ह परिवहन संबंधी सेवा मन म विस्तार बर राज्यभर म 1000 परिवहन सुविधा केन्द्र के स्थापना के घोषणा करे हें। ए सुविधा के बाद परिवहन संबंधी सुविधा मन बर मनखे मन ल अनाधिकृत एजेंट मन के चक्कर लगाय के जरूरत झन परही, उहें परिवहन संबंधी सुविधा घर तीर ही उपलब्‍ध हो जाही। परिवहन सुविधा केन्द्र के स्थापना ले एक कोति जिहां परिवहन सुविधा मन बर मनखे मन के पहुंच आसान हो जाही, उहें मनखे मन ल एखर संचालन के संग रोजगार घलोक उपलब्‍ध होही। राज्य म परिवहन सुविधा केन्द्र के स्थापना ले करीब 5 हजार युवा के रोजगार सृजन के सम्भावना हे।
एखर तहत परिवहन मंत्री श्री मोहम्मद अकबर के मार्गदर्शन म राज्यभर म परिवहन सुविधा केन्द्र मन के स्थापना तेजी ले जारी हे। राज्यभर म अब तक 219 परिवहन सुविधा केन्द्र के स्थापना हो गे हे। एमां जिला परिवहन कार्यालय रायपुर के अंतर्गत 32, कांकेर अंतर्गत 4, राजनांदगांव अंतर्गत 12 अऊ रायगढ़ अंतर्गत 9 परिवहन सुविधा केन्द्र के स्थापना सामिल हे। अइसनहे महासमुन्द जिला परिवहन कार्यालय के अंतर्गत 14, धमतरी अंतर्गत 18, जांजगीर-चांपा अंतर्गत 18, जगदलपुर अंतर्गत 8, बैकुण्ठपुर अंतर्गत 2, अंबिकापुर अंतर्गत 6 अऊ सूरजपुर अंतर्गत 10 परिवहन सुविधा केन्द्र मन के स्थापना हो गे हे। एखर अलावा कोण्डागांव अंतर्गत 9, कबीरधाम अंतर्गत 14, गरियाबंद अंतर्गत 13, सुकमा अंतर्गत 8, बलरामपुर अंतर्गत 3, जशपुर अंतर्गत 4, गौरेला-पेण्ड्रा-मरवाही अंतर्गत 2, कोरबा अंतर्गत 9, मुंगेली अंतर्गत 7, बलौदाबाजार-भाटापारा अंतर्गत 12 अऊ बालोद के अंतर्गत 5 केन्द्र मन के स्थापना हो गे हे।
मार्गदर्शिका के मुताबिक ऑनलाइन आवेदन बर सेवा शुल्क के रूप म 100 रूपिया, परिवहन विभाग ल ऑनलाइन फीस/टैक्स भुगतान करे बर (हरेक एक हजार रूपिया या ओखर हिस्सा बर) 50 रूपिया, लर्निंग लाइसेंस बर शुल्क 50 रूपिया, आवेदन पत्र बर जरूरी कागद के स्कैनिंग, कम्प्रेसिंग व अपलोड (प्रति पेज) 5 रूपिया अऊ ऑनलाइन आवेदन पूर्ति के पूरा कागद मन के प्रिंटआउट शुल्क (प्रति पेज) 5 रूपिया निरधारित हे।