- अभिव्यक्ति के स्वतंत्रता खतरा म हे, नफरत फइलइया ताकत मन देश के मुंह बंद करना चाहत हे
- छत्तीसगढ़ सरकार सबो मनखे मन ल ध्यान म रखके करत हे फैसला
- मुख्यमंत्री भूपेश बघेल समावेशी दृष्टिकोण ले सबो के बेहतरी बर करत हे काम
- छत्तीसगढ़ विधासभा भवन के नवा भवन के नवा रायपुर म शिलान्यास
रायपुर, 29 अगस्त 2020। सांसद श्रीमती सोनिया गांधी अऊ सांसद श्री राहुल गांधी अऊ श्री मोतीलाल वोरा के वर्चुअल उपस्थिति म मुख्यमंत्री श्री भूपेश बघेल अऊ विधानसभा अध्यक्ष डा. चरणदास महंत ह आज नवा रायपुर म छत्तीसगढ़ विधानसभा के नवा भवन के निर्माण बर बटन दबाके शिलापट के अनावरण करिन। नवा रायपुर के सेक्टर 19 म करीबन 270 करोड रुपिया के लागत ले ये भवन महानदी अऊ इंद्रावती भवन के पीछू 51 एकड़ म बनही। मुख्य भवन के निर्माण 52 हजार 497 वर्ग मीटर म करे जाही।
ये बेरा म सांसद श्रीमती सोनिया गांधी ह छत्तीसगढ़ विधानसभा के नवा भवन बर छत्तीसगढ़ के जनता ल बधाई अऊ शुभकामना देवत कहिन के संसद अऊ विधानसभा लोकतंत्र के सबले बड़का खंबा अऊ पवित्र मंदिर ये। इहां संविधान के रक्षा होथे, फेर ये सुरता रखना होही के संविधान ह बिल्डिंग या भवन ले नहीं भावना ले बांचही। उमन कहिन के हमार पुरखा मन ह आजादी के लड़ाई लडि़न, ऊंखर सपना मन ल पूरा करे बर अभी हमन ल बहुत कुछ करना हे। श्रीमती सोनिया गांधी ह देश के अभी हाल के स्थिति के बारे म कहिन के देश अऊ समाज म नफरत फैलइया ताकत मन लोकतंत्र के आगू चुनौती बन गए हे। अभिव्यक्ति के स्वतंत्रता खतरा म हे, लोकतांत्रिक संस्था मन ल ध्वस्त करे जात हे। नफरत फैलइया ताकत मन चाहत हें के समाज के सबो वर्ग के मनखे अपन मुंह बंद रखयं। उमन देश के मुंह बंद करना चाहत हें। राष्ट्रपिता महात्मा गांधी, पंडित जवाहर लाल नेहरू, डा. राजेंद्र प्रसाद, बाबा साहब डा. भीमराव अंबेडकर ह ये सोचे नइ रहीन होहीं के आजादी के 73 साल बाद घलव अइसन कठिन समय के सामना मनखे मन ल करना परही। उमन कहिन के आज हम शपथ लेवन के हम समाज के आखरी मनखे ल ध्यान म रखके फैसला लेबोन। उमन मुख्यमंत्री श्री भूपेश बघेल अऊ छत्तीसगढ़ सरकार के कामकाज ल सहरावत कहिन के छत्तीसगढ़ सरकार आखरी मनखे ल ध्यान म रखके फैसला लेवत हे। उमन ये मौका म छत्तीसगढ़ सरकार कोति ले किसान, आदिवासी अउ गरीब मन के हित म करे जात काम मन के संगेच राजीव गांधी किसान न्याय योजना, गोधन न्याय योजना, सुपोषण अभियान, तेंदूपत्ता संग्रहण दर म वृद्धि के उल्लेख करिन अऊ कहिन के मुख्यमंत्री श्री भूपेश बघेल समावेशी दृष्टिकोण ले सबो वर्ग के विकास बर काम करत हें।