मुख्यमंत्री परमेश्वरी महोत्सव म होइन सामिल
रायपुर, 10 फरवरी 2020। मुख्यमंत्री श्री भूपेश बघेल ह काली कहिन के हमर कोसा के सोर दुनिया भर म हे। एखर पीछू देवांगन समाज के कड़ा मेहनत हे। एखरे संगेच वस्त्र व्यवसाय म लगे समाज के मनखे मन ल डिजाइनर कपड़ा मन कोति घलोक धियान देना चाही, जेकर से ओ मन ल बड़का बाजार के लाभ मिल पाही। बाजार बर शासन कोति ले पूरा मदद करे जाही। मुख्समंत्री काली पाटन म परमेश्वरी महोत्सव ल सम्बोधित करत रहिन।
मुख्यमंत्री ह कहिन के अभी मैं दंतेवाड़ा गए रहेंव। उहां मैं ह स्व-सहायता समूह के महिला मन के काम देखेंव। ओ मन कपड़ा डिजाइन करत हें अऊ एला बंगलुरू अऊ चेन्नई म घलोक भेजत हें। एकर अच्छा बाजार ए शहर मन म बन गए हे। हमर परंपरागत वस्त्र कौशल शानदार हे। ये मा नवा जमाना के वस्त्र प्रयोग के मुताबिक डिजाइन बनाए जाए त बड़का आर्थिक संभावना पैदा होही। उमन कहिन कि छत्तीसगढ़ के उत्पाद मन के विशिष्ट मांग बाजार म हे। केवल देश म ही नहीं, विदेश मन म घलोक। इंकर व्यावसायिक संभावना मन के विस्तार बर हमन बीते दिन म रायपुर म सेलर्स-बॉयर्स प्रोग्राम के आयोजन करे रहेन, ये मां 16 देश के 48 कंपनी मन ह हिस्सा लेहे रहिन। विदेश मन म छत्तीसगढ़ के कोदो, कुटकी अऊ सांवा के भारी डिमांड हे। ये उत्पाद हेल्थ सेक्टर म अड़बड़ उपयोगी हे। अइसनहे छत्तीसगढ़ के कपड़ा मन बर घलोक अंतर्राष्ट्रीय बाजार के काफी रुचि हे। अब समय आ गए हे कि अपन हुनर ल बड़का प्लेटफॉर्म देवव। शासन आप मन के पूरा सहयोग बर वचनबद्ध हे।
ये मौका म मुख्यमंत्री ह कहिन कि अभी हालेच म खराब मौसम के चलत किसान मन ल धान बेचे म कोनो असुविधा झन होवय कहि के धान खरीदी ल एक हफ्ता बढ़ाए के निर्णय घलोक शासन कोति ले ले गीस। उमन कहिन कि किसान मन के खाता म धान खरीदी के बांचे राशि के भुगतान घलोक लउहे कर दे जाही। उमन कहिन कि किसान मन के संतोष अऊ सुख सरकार के सर्वोच्च प्राथमिकता हे। ऊंखर हित ल देखत शासन कोति ले निर्णय लेहे जाथे।
