सूरजपुर, जिला के परशुरामपुर जलाशय योजना ले इहां के किसान मन ल खेती-किसानी म भरपूर लाभ मिलत हे। साल 2006 म बने ये जलाशय ले चार गांव के सैकड़ो किसान मन सिंचाई सुविधा के फायदा उठावत हें।
अक्षांश 23.06‘40‘‘ अउ देशांतर 82.48‘15‘‘ म स्थित ये बांध के कुल लंबाई 12.60 मीटर अउ अधिकतम ऊंचाई 20.70 मीटर हे। बांध के ऊपर के चौड़ाई 6 मीटर हे, जबकि एकर कुल जल भराव क्षमता (पानी भरे के क्षमता) 9.452 मिलियन क्यूबिक मीटर हे।
बांध के रूपांकित सिंचाई क्षमता खरीफ म 809 हेक्टेयर अउ रबी म 441 हेक्टेयर यानी कुल 1250 हेक्टेयर हे। मुख्य नहर के लंबाई 5 किलोमीटर हे, जबकि 5 ठन शाखा नहर मन के कुल लंबाई 4.9 किलोमीटर हे।
किसान मन ल मिलत हे बड़का लाभ:- परशुरामपुर, जगन्नाथपुर, सुरता अउ अक्षयपुर गांव के किसान मन ये जलाशय ले सिंचाई के लाभ लेवत हें। अभी हाल म बांध म 5.75 मिलियन क्यूबिक मीटर पानी उपलब्ध हे।
साल 2025 म खरीफ के वास्तविक सिंचाई 630 हेक्टेयर म करे गीस, जबकि रबी फसल के कुल लक्ष्य 170 हेक्टेयर रखे गे रिहिस। रबी सीजन म कुल 131 किसान मन खेती करे हें, जेमा ग्राम परशुरामपुर के 50, सुरता के 35, अक्षयपुर के 30 अउ जगन्नाथपुर के 16 किसान सामिल हें।
बीज वितरण ले मिलिस मदद:- कृषि विभाग कोति ले बीज ग्राम योजना के तहत ये बछर किसान मन ल 29 क्विंटल गेहूं अउ 1 क्विंटल सरसों के बीज बांटे गे हे।
अभी के समय ग्राम परशुरामपुर म 35 हेक्टेयर म अलग-अलग फसल उगाए जावत हे, जेमा गेहूं 20 हेक्टेयर, सरसों 2 हेक्टेयर, चना 1 हेक्टेयर अउ मटर के खेती सामिल हे।
स्थानीय किसान मन के कहना हे के जलाशय योजना ले ओ मन ल समय म सिंचाई के सुविधा मिलत हे, जेकर ले फसल उत्पादन म बाढ़ोत्तरी होय हे अउ उंकर आर्थिक स्थिति म सुधार आए हे। ये योजना क्षेत्र के कृषि विकास म मील के पथरा साबित होवत हे।
