भ्रष्टाचार के मामला म दू पटवारी निलंबित

राशि के अवैध लेन-देन के बात स्टिंग ऑपरेशन म पहिली नजर म सही पाये जाय म एसडीएम रायपुर ह करिस कार्यवाही
रायपुर, 10 फरवरी 2021/ रायपुर के एसडीएम ह पटवारी हल्का नम्बर 58 ग्राम डंगनिया के पटवारी विजय कुमार साहू अऊ पटवारी हल्का नम्बर 60 ग्राम भाटागांव के पटवारी भाई लाल अनंत ल जमीन नामांतरण अउ राजस्व कागद ल ऑनलाईन करे के बलदा म अवैध रूप ले लेन-देन के मामला पहिली नजर म सही पाए जाय म तुरंत प्रभाव ले निलंबित कर देहे हे। निलंबन के ये कार्यवाही दुनों पटवारी मन के संग शासकीय काम-काज के एवज म अवैध रूप ले राशि के लेन-देन अउ भ्रष्टाचार के बात रिकॉर्ड होए स्टिंग वीडियो क्लीपिंग ल देखे अउ गुने के बाद करे गए हे।
एसडीएम रायपुर के निलंबन आदेश म ए बात के उल्लेख हे कि दुनों पटवारी मन के जमीन नामांतरण अऊ कागद ल ऑनलाईन करे डिजिटल सिग्नेचर आदि के मामला म अवैध तरीका ले राशि के लेन-देन के बात-चीत के मामला स्टिंग वीडियो क्लीपिंग म सामने आए हे। एखर बाद एसडीएम रायपुर ह दुनों पटवारी मन ल कारण बताओं नोटिस जारी करके उंखर से जवाब-तलब करिस। दुनों पटवारी मन के जवाब संतोषप्रद नइ पाए गिस अउ स्टिंग वीडियो क्लीपिंग म अवैध तरीका ले राशि के लेन-देन के मामला पहिली नजर म सही पाए गीस त, निलंबन के कार्यवाही करे गीस। एसडीएम ह ग्राम डंगनिया पटवारी हल्का नम्बर 58 के प्रभार ग्राम सरोना के पटवारी सुरेश कुमार वर्मा ल अउ भाटागांव पटवारी हल्का नम्बर 60 के प्रभार मठपुरेना के पटवारी नरेश ठाकुर ल अस्थायी रूप ले सौंपे गए हे।