पर्यावरण बचाए, संवारे अउ किसान मन के आय बढ़ाए के संकल्प: मुख्यमंत्री दाउ भूपेश बघेल

रइपुर, 06 जून 2021 इतवार। मुख्यमंत्री दाउ भूपेश बघेल आज अपन घरू कार्यालय चलत वर्चुअल कार्यक्रम के माध्यम ले ‘मुख्यमंत्री वृक्षारोपण प्रोत्साहन योजना’ के प्रदेशव्यापी शुभारंभ करत कहीन कि हमन एकर ले पर्यावरण ल बचाए अउ संवारे के संगे—संग गंवईहा अउ किसान मन के आर्थिक स्थिति ल बने बनाए के संकल्प लिए हवन। सबो के भागीदारी ले हम ये संकल्प ल पूरा करबोन। ‘मुख्यमंत्री वृक्षारोपण प्रोत्साहन योजना ‘ म फलदार, ईमारती, गैर-ईमारती अउ औषधीय पौधा मन के लगाए बर लोगन मन ल प्रोत्साहन राशि देहे तको प्रावधान करे गे हवय।
श्री बघेल ह ये बेरा म सब ल ‘मुख्यमंत्री वृक्षारोपण प्रोत्साहन योजना’ के बड़का रूप म प्रचार प्रसार करे, लोगन ल पौधा लगाए अउ उंकर सुरक्षा बर प्रेरित अउ प्रोत्साहित करे के बात कहीन। ये पइत राज्य म वृक्षारोपण अभियान ल वृक्षारोपण प्रोत्साहन योजना के रूप म संचालित करे जावत हवय। एमे अधिक जनभागीदारी होए ले वृक्षारोपण के सफलता के गारंटी तको अधिक होही।
वन मंत्री श्री मोहम्मद अकबर ह कहीन कि मुख्यमंत्री वृक्षारोपण प्रोत्साहन योजना एक क्रांतिकारी योजना साबित होही। कार्यक्रम म वीडियो कॉन्फ्रेंसिंग ले संघरे खाद्य मंत्री श्री अमरजीत भगत, संसदीय सचिव श्री चिंतामणी महाराज, श्रीमती रश्मि आशीष सिंह, श्री विनोद चंद्राकार, श्री शिशुपाल सोरी, सांसद श्री दीपक बैज, श्री मोहन मण्डावी अउ श्री अरूण साव संग आने जनप्रतिनिधि, पंचायत पदाधिकारी अउ किसान मन ह मुख्यमंत्री
वृक्षारोपण प्रोत्साहन योजना ल सहराईन अउ कहीन कि एकर ले छत्तीसगढ़ राज्य म पर्यावरण अउ किसानों के स्थिति पोठ होही। उन मन येला मुख्यमंत्री दाउ भूपेश बघेल के एक अनूठा पहल कहीन।
मुख्यमंत्री ह कार्यक्रम म बस्तर के गांव कोहकीमारी, डिलमिली अउ करपावण्ड बलरामपुर जिला के भेलईखुर्द, कांकेर जिला के कुलगांव, महासमुन्द जिला के मुंगईमाता, बिलासपुर म अरपा नदी के तट म स्थित गांव सेंदरी, कवर्धा जिला के लोहझरी म वन प्रबंधन समिति, किसान मन कोति आने—आने प्रजाति के फलदार वृक्ष मन ल लगाए के सेति बधई अउ शुभकामना दीन।