गौठान मन म होवइय दूध के गांवे म खपत अउ पशु मन बर चारा के पोठ बेवस्था बर तियार करे जाही कार्य योजना
गोधन न्याय योजना अउ राज्य डेयरी उद्यमिता विकास योजना के हितग्राही मन ल राशि वितरण के कार्यक्रम म मुख्यमंत्री दीस हुकुम
आंगनबाड़ी अउ स्कूल मन मध्यान्ह भोजन योजना म लइका मन ल दूध देहे ले कुपोषण दुरिहाही
रइपुर, मुख्यमंत्री दाऊ भूपेश बघेल ह गांव के गौठान मन म पशुपालन अउ दूध बेवसाय ल पंदौली देहे बर गौठान मन होवइया दूध के गांवे म खपत करे अउ पशु केमन के चारा के पोठ बेवस्था सुनिष्चित करे बर अधिकारी मन ल कार्य योजना तियार करे के हुकुम दीस। मुख्यमंत्री कहीन कि जऊन किसम ले राजीव गांधी किसान न्याय योजना से किसान लाभान्वित होवत हवयं, ओइसनेहेच गौठान मन म चलत डेयरी ले होवइया दूध के खपत अउ पशु मन के चारा के बेवस्था होए ले पशुपालक लाभान्वित होही अउ पशुपालन बर पंदौली पाहीं।
गांव के आंगनबाड़ी केन्द्र अउ स्कूल मन म मध्यान्ह भोजन कार्यक्रम के तहत जिला प्रशासन के सहयोग ले लइका मन ल चूरो के दूध उपलब्ध कराए के बेवस्था करे जाय। येकर ले पशुपालक मन ल दूध के सही मूल्य मिलही। गांव के मन दूधारु पशुपालन बर पलौंदी पाही। मुख्यमंत्री दाऊ बघेल ह मुख्य सचिव ल येकर बर कार्य योजना तियार करे हुकुम दीस।
मुख्यमंत्री दाऊ बघेल ह आज अपन घरू कार्यालय म गोधन न्याय योजना के हितग्राही मन ल राशि वितरण अउ राज्य डेयरी उद्यमिता विकास योजना के तहत हितग्राही मन ल अनुदान राशि बाँटे बर होवइया आभासी कार्यक्रम ल सम्बोधित करत ये हुकुम दीस। मुख्यमंत्री कार्यक्रम म गोधन न्याय योजना के तहत गोबर बेचइया पशुपालक, ग्रामीण, गौठान ले जुरे महिला समूह अउ गौठान समिति मन ल 10 करोड़ 84 लाख रूपिया के राशि ऑनलाइन जारी करीस। ये राशि म ले 15 जून ले 30 जून तक राज्य के गौठान म पशुपालक ग्रामीण, किसान, भूमिहीन मन ले क्रय करे गे गोबर के एवज म 3.69 करोड़ रूपिया के करे गीस। गौठान समिति मन ल 4.31 करोड़ अउ महिला समूह मन ल 2.84 करोड़ रूपिया के लाभांश राशि के भुगतान करीस। अइसेनेहे वोमन राज्य डेयरी उद्यमिता विकास योजना के तहत 25 हितग्राही मन ल 13.63 लाख रूपिया के अनुदान राशि के भुगतान हितग्राही मन के खाता म करीस।
उन कहीन कि गौठान मन म डेयरी बेवसाय करइया हितग्राही मन ल छै महीना बाद एक ठो उपराहा गाय आने योजना ले दे जाही। मुख्यमंत्री दाऊ बघेल ह भेंट-मुलाकात अभियान के उल्लेख करत कहीन कि गौठान म वर्मी कम्पोस्ट के उत्पादन संग चलत आने गतिविधि मन ले गांव मन म बदलाव नजर आवत हवय। लोगन के आय बाढ़ीस हवय अउ वोमन म एक ठो नवा आत्मविश्वास जागिस हावय। उन कहीन कि गोधन न्याय योजना के सफलता ले प्रदेश म गौठान मन के संख्या म 44 प्रतिशत के बढ़ौतरी होइस हे। बछरभर म खरीदे गे गोबर के मात्रा अउ गोबर खरीदी के राशि बढ़ौतरी होइस हे।
योजना के तहत अब तक 75 लाख 38 हजार क्विंटल गोबर के खरीदी के एवज म 150.75 करोड़ रूपिया के करे जा चुके हवय। गौठान समिति अउ महिला स्व-सहायता समूह ल अब तक 143.19 करोड़ रूपिया के भुगतान करे जा चुके हे। गोधन न्याय योजना ले 2 लाख 11 हजार ले अधिक ग्रामीण, पशुपालक किसान लाभान्वित होवत हे। गोबर बेचके उपरहा आय अर्जित करइया मन म 45.97 प्रतिशत संख्या माइलोगन मन के हवय। एक लाख 33 हजार ले अधिक भूमिहीन परिवार लाभान्वित होवत हावय।
