एक पाव दूध हरेक मनखे बर होना चाही, अभी केवल आधा पाव होथे, उन्नत नस्ल के पशु पालन ले बदलही स्थिति

– कुम्हारी के खपरी म आयोजित जिला स्तरीय पशु मेला म प्रदर्शित करे गीस उन्नत नस्ल, पीएचई मंत्री श्री गुरु रुद्रकुमार घलोक होइन शामिल

दुर्ग 16 फरवरी 2020। प्रदेश म पशुपालन के संभावना ल बढ़ाए के काबर जरूरत हे ए संबंध म तथ्य मन के माध्यम ले जिला स्तरीय पशु मेला म जानकारी देहे गीस। एकर आयोजन पीएचई मंत्री श्री गुरु रूद्र कुमार जी के अध्यक्षता म खपरी कुम्हारी म होइस। आयोजन म पशुपालन करइया प्रगतिशील किसान मन ह अउ पशुपालन के क्षेत्र ले जुड़े खांटी जानकार मन ह हिस्सा लीन। उमन आंकड़ा के माध्यम ले बताइन के कइसे अभी दुग्ध उत्पादन के प्रदेश म कमी हे अऊ एला कइसे उन्नत नस्ल के पशु मन के पालन ले अउ नस्ल संवर्धन ले बढ़ाए जा सकत हे। खांटी जानकार मन ह बताइन के अभी छत्तीसगढ़ म प्रति व्यक्ति 300 मिलीलीटर दूध जरूरी हे फेर हमार इहां अभी 140 मिलीलीटर दूध के ही उत्पादन होवत हे। येमा बड़का अंतर हे अऊ ए अंतर ल दूर करे बर हमला उत्तम नस्ल के पशु पालन कोती बढ़ना होही। पशुपालन विभाग के योजना मन के लाभ उठाना होही। पशु मन के नस्ल संवर्धन कराना होही।

प्रगतिशील किसान मन ह सब्सिडी के माध्यम ले पशु लीन अऊ आज ओ मन बड़का डेयरी के संचालन करत हें। खांटी जानकार मन ह बताइन के अइसनहे अंडा के उत्पादन म घलोक इहां बनेच गुंजाइश हे। देश भर म ये नारा देहे जाथे के संडे हो या मंडे रोज खाएं अंडे, कहूँ रोज एक मनखे एक अंडा खाही त 365 अंडा के जरूरत होही फेर जऊन देशी मुर्गी हे वो 50 अंडे देथे, फॉर्म के मुर्गी 300 के आसपास देथे त ए प्रकार ले एक बड़का अंतर हे अऊ इहां उन्नत नस्ल के कुकरी पालन के बड़ संभावना बनही। इहां पशु मेला म जऊन पशु लाए गए हे वो आस-पास के ही किसान मन के पशु हे। येला देख के आप समझ सकत हव के कोन प्रकार ले पशु मन के नस्ल संवर्धन के माध्यम ले उमन अपन तकदीर ल बदल दीन। पशुपालन ह खेती बर सहारा बनिस अऊ उंखर आय दुगुना करे के घलोक सहारा बनिस। ए मौका म पीएचई मंत्री अउ अहिवारा विधायक श्री गुरु रूद्र कुमार ह कहिन के मैं ह अभी जिला स्तरीय पशु मेला म बहुत उन्नत किसिम के नस्ल के पशु देखेंव, अड़बड़ खुशी के बात हे के इंकर पालन गांव के ही प्रगतिशील किसान मन करत हें। गीर प्रजाति के, साहिवाल प्रजाति के ए पशु मन ल देखके लगथे के नस्ल म सुधार के बाद पशुपालन बर बड़का संभावना किसान मन बर हे।

मुख्यमंत्री श्री भूपेश बघेल के सियानी म चलत सरकार ह नरवा, गरवा, घुरवा बारी योजना लागू करे हे एकर एक जरूरी हिस्सा गरुआ ल लेके हे एखर अंतर्गत हम नस्ल संवर्धन के कार्यक्रम करत हन। ये कार्यक्रम जतका जल्दी करे जाही, वोतकेच जल्दी प्रदेश म पशुपालन ले आय के बेहतर संभावना बनही। ए मौका म मंत्री ह ग्राम खपरी म 5 लाख रुपिया के लागत ले सामुदायिक भवन के घोषणा करिन। संगेच उमन ग्राम खपरी म सबो घर मन म नल जल बर पाइप लाइन के विस्तार के घोषणा घलोक करिन। उमन कहिन के सबो बीपीएल परिवार ल निशुल्क नल कनेक्शन देहे जाही। शुद्ध जल उपलब्ध कराए बर सरकार प्रतिबद्ध हे एखर बर हितग्राही मन ल चीन्हे ल घलोक उमन कहिन। कार्यक्रम के आखरी म सबले बेहतर नस्ल के पशु मन के पालन करया प्रगतिशील किसान मन ल मंत्री ह सम्मानित करिस। ए मौका म पशुधन विकास विभाग के उपसंचालक डॉ एम.के. चावला संग आन अधिकारी घलोक उपस्थित रहिन।