ग्राम दरबार मोखली मे डॉ. खूबचंद बघेल जयंती समारोह के करे गइस आयोजन
स्वतंत्रता संग्राम सेनानी स्वर्गीय श्री घनाराम बंछोर अउ श्री गैंदलाल बंछोर के प्रतिमा के करिस अनावरण
नव निर्मित रेस्ट हाउस के करिस लोकार्पण
रायपुुर, 30 जुलाई 2023
पाटन के धरती स्वतंत्रता संग्राम सेनानी के धरती हे। अंग्रेज के कुशासन के विरूद्ध अवाज उठाए के साहस ए धरती के सपूत मन ह करिस। हमन ह उमन ल नमन करत हन। ए बात दुर्ग जिला के पाटन विकासखंड के ग्राम दरबार मोखली म आयोजित मनवा कुर्मी क्षत्रिय समाज पाटन राज के डॉ. खूबचंद बघेल जयंती समारोह म मुख्यमंत्री श्री भूपेश बघेल ह कहिस। इहां ओ ह स्वतंत्रता संग्राम सेनानी स्वर्गीय श्री घनाराम बंछोर अउ स्वर्गीय श्री गैंदलाल बंछोर के प्रतिमा के अनावरण करिस। अऊ संग म ओ ह दरबार मोखली मे 46 लाख 88 हजार रूपिया के लागत ले जल संसाधन विभाग के नवनिर्मित रेस्ट हाउस के लोकार्पण करिस। अऊ साथ ही ओ ह ग्राम दरबार मोखली अउ सेमरी म एक करोड़ 21 लाख 75 हजार रूपिया के विभिन्न निर्माण कार्य के लोकार्पण घलो करिस।
समारोह ल संबोधित करत हुए श्री बघेल ह कहिस के मोला ए बात के अबड़ खुसी हे के दरबार मोखली मोर परोसी गांव ए, जिहां स्वतंत्रता संग्राम म हमार पूर्वज मन रहिस। स्वर्गीय गैंदलाल बंछोर क्षेत्र के पहिली वकील रहिस। गांधी जी ले प्रेरणा लेके ओ ह स्वतंत्रता संग्राम म गईस। वो ह ओ दारी छतर सिंह ल जे पत्र लिखे हे उकर विवरण देखे ले मिलथे ले कतक कठिन संघर्ष हमार पूर्वज मन ह आजादी के लड़ाई लड़े ब करिस। डॉ. खूबचंद बघेल के गीत ’गजब विटामिन भरे हुए हे, छत्तीसगढ़ के बासी मा’ गीत के उल्लेख करत हुए ओ ह कहिस कि हमार पूर्वज न केवल अंग्रेज मने स्वतंत्रता चाहत रहिस, बल्कि अइसे व्यवस्था चाहत रहिस, जेकर से अपन छत्तीसगढ़ी संस्कृति के प्रति गौरव हो। हमन अपन पूर्वज मन के देखाए रास्ता म चलबके छत्तीसगढ़ी संस्कृति ल सहेजे के दिशा म काम करत हन।
हमन बोरे-बासी दिवस मना के छत्तीसगढ़ के खान-पान परम्परा अउ मेहनतकश संस्कृति के उत्सव मनाय हन। आज पूरा देश म छत्तीसगढ़ के पहिचान एकर सुघ्घर अउ विशिष्ट संस्कृति ल लेके होइस हे। हमन अपन गीत-संगीत, कला, कौशल ल राष्ट्रीय मंच प्रदान करे हन। पहिली बार आदिवासी नृत्य महोत्सव के आयोजन होइस, जेमा देश-विदेश के कलाकार मन ह हिस्सा लिस। हमन छत्तीसगढ़ के ऐतिहासिक पौराणिक धरोहर ल सहेजे के बुता करत हन। हर जिला म छत्तीसगढ़ महतारी के प्रतिमा स्थापित करत हन, जे हमार पूर्वज मन के सपना रहिस वो अब पूरा होवत हे। मुख्यमंत्री ह कहिस कि डॉ. खूबचंद बघेल के 100वीं जयंती के अवसर म छत्तीसगढ़ राज्य बने रहिस, फेर राज्य बने के सही मायने म एहसास अब होइस हे, जब हमन अपन सांस्कृतिक मूल्य ल लेके आघू बाढ़त हन।
मुख्यमंत्री ह ए अवसर म नरवा, गरवा, घुरवा, बाड़ी अउ ग्रामीण विकास योजना के चरचा घलो करिस। संग ही विविध क्षेत्र म होए सकारात्मक बदलाव के घलो गोठ करिस। ओ ह दरबार मोखली म हाई स्कूल के उन्नयन अउ शीतला तालाब के सौंदर्यीकरण के घोषणा घलो करिस।
छत्तीसगढ़ मनवा कुर्मी क्षत्रिय समाज के केंद्रीय अध्यक्ष श्री चोवा राम वर्मा ह छत्तीसगढ़़ राज्य के प्रथम स्वप्नद्रष्टा डॉ. खूबचंद बघेल के व्यक्तित्व अउ कृतित्व ल विस्तार पूर्वक रेखांकित करिस। ओ ह स्वतंत्रता संग्राम सेनानी स्वर्गीय गैंदलाल बंछोर अउ स्वर्गीय घनाराम बंछोर के जीवनी म प्रकाश डारिस।
ए अवसर म मुख्यमंत्री के ओएसडी श्री आशीष वर्मा, जनपद पंचायत पाटन के उपाध्यक्ष श्री देवेंद्र चंद्रवंशी, जनपद सदस्य श्रीमती वेदना वर्मा, सभापति महिला बाल विकास श्रीमती दुर्गा नेताम, सरपंच श्री आशीष बंछोर, श्री शंकर बघेल अउ श्री राजेश ठाकुर समेत अउ जनप्रतिनिधि, सामाजिक पदाधिकारीगण मौजूद रहिस।
Neha Rathore
पाटन स्वतंत्रता संग्राम सेनानी के धरती: मुख्यमंत्री श्री बघेल
