पुष्पवर्षा ले पाटन के नागरिक मन ह करिन स्वागत, मुख्यमंत्री ह घलोक बरसाइन फूल
रायपुर, गांधी विचार पदयात्रा पाटन म जिहां-जिहां पहुंचिस, देशभक्ति के उत्साह के सैलाब ले एकर स्वागत होइस। उत्साह ले अभिभूत नागरिक मन ह मुख्यमंत्री श्री भूपेश बघेल के आरती करिन, तिलक लगाइन अऊ पुष्पवर्षा करिन। मुख्यमंत्री ह घलोक नागरिक मन उपर पुष्प बरसाइन। पाटन के गली मन म छत मन म घलोक मनखे फूल लेहे खड़े रहिन अऊ पदयात्रा के स्वागत करत रहिन। मुख्यमंत्री न सिरिफ मनखे मन ले मिलिन भलुक उंखर हाल चाल घलोक पूछिन। उमन पदयात्रा के रूट म परइया पाटन के सबो देवी-देवता मन के मंदिर मन म दर्शन घलोक करिन। संगेच जैतखंभ म घलोक पुष्प चढ़ाइन। उमन संत रैदास के दर्शन करिन अऊ मिनी माता के प्रतिमा म घलोक पुष्प अर्पित करिन।
