रायपुर, 02 जून 2020। मुख्यमंत्री श्री भूपेश बघेल ले आज इहां ऊंखर निवास कार्यालय म पाटन विधानसभा क्षेत्र ले आए जनपद सदस्य मन, सरपंच अऊ आम नागरिक मन के प्रतिनिधिमंडल ह सौजन्य मुलाकात करिन। ये मुलाकात म मुख्यमंत्री श्री भूपेश बघेल ह पाटन विधानसभा के कई ठन ग्राम पंचायत के सरपंच मनले ऊंखर इहां चलत मनरेगा ले जुड़े काम, गौठन के निर्माण अउ परिसंपत्ति मन के रख-रखाव, स्कूल के संचालन, पेयजल के उपलब्धता संग आन विकासकार्य मनके जानकारी लीन अऊ सबो ले उंखर हाल-चाल जानिन।
मुख्यमंत्री श्री भूपेश बघेल ह राजीव गांधी किसान न्याय योजना के पहली किश्त के राशि प्राप्त होए म सबो किसान मन ल बधाई देवत कहिन के कोरोना महामारी के ये संकटकाल म घलोक छत्तीसगढ़ सरकार ह किसान मन ल न्याय योजना अऊ मजदूर मन ल मनरेगा के माध्यम ले आर्थिक सम्बल प्रदान करे हे। उमन पंचायत पदाधिकारी अउ गांव वाले मन ल गांव मन म कोरोना संक्रमण ले बचाव बर सबो उपाय ल अपनाए के बात कहिन।
ये बेरा म पाटन क्षेत्र के मनखे मन ह अपन क्षेत्र के कई ठन समस्या ले मुख्यमंत्री ल अवगत कराइन। श्री बघेल ह समस्या मन के निदान बर जरूरी पहल करे के भरोसा देवाइन। ये बेरा म पाटन क्षेत्र ले आए प्रतिनिधिमंडल म श्री कान्हा साहू, श्री धर्मेंद्र साहू, श्री सन्तराम कुर्रे, श्री गंगा प्रसाद निषाद, श्री शैलेष साहू अऊ आन मनखे उपस्थित रहिन।
