ग्राम पतोरा म आयोजित कार्यक्रम म पहुंचिन मुख्यमंत्री श्री भूपेश बघेल, जुन्ना हनुमान मंदिर म भगवान के दर्शन घलोक करिन
दुर्ग, हमर सरकार के योजना मन के सेती किसान मन म खेती ऊपर भरोसा लहुटे हे। 2500 रुपये म धान खरीदी अउ कर्जमाफी के निर्णय ले किसान मन ल आर्थिक संबल मिले हे। ए साल प्रदेश म कोनो किसान ह आत्महत्या नइ करिस। ये बात मुख्यमंत्री श्री भूपेश बघेल ह ग्राम पतोरा म आयोजित कार्यक्रम म कहिन। ओ मन सार्वजनिक हनुमान मन्दिर उत्सव म भाग लेहे पहुंचे रहिन। मुख्यमंत्री ह ए बेरा म कहिन कि सरकार ह न केवल किसान मन ल फसल के उचित दाम देवाये ल लेके पहल करे हें भलुक ग्रामीण विकास के एक अइसे योजना म काम करत हे जेखर से आत्मनिर्भर गांव के रद्दा तइयार होही। एखर बर संसाधन गांव ले ही आही। पशुधन के उचित दोहन ले बढ़िया आय के संभावना बनही। गौठान म उत्पादित कम्पोस्ट खाद मन के माध्यम ले जैविक खेती के रद्दा घलोक तैयार होही अऊ कम्पोस्ट खाद के अच्छा कीमत घलोक हासिल होही। ए बेरा म मुख्यमंत्री ह कहिन कि मे हर साल पतोरा आथंव अऊ हनुमान जी के दर्शन करथंव। हनुमान जी ज्ञानी घलोक हे, योगी घलोक हे अऊ भक्त घलोक हे। राम काज कीजे बिना मोहि कहां बिसराम। हनुमान जी ले हमला प्रेरणा मिलथे कि हम अपन काम सरलग करना चाही। बिना थके सरलग सेवा भाव ले काम करना चाही। इहां बड़ संख्या म गांव के जवान अऊ लइका बइठे हे। जीवन म ज्ञान, शक्ति अऊ सेवाभाव के सुंदर संतुलन ले हम मनमुताबिक चीज पा सकत हन। मुख्यमंत्री ह ए बेरा म कहिन कि मे हर साल आप मन के बीच आथंव। हनुमान जी के पूजा अर्चना करथंव अऊ आप मन सबो ले मिलथंव। ए साल घलोक में आप मन के बीच आ सकेंव, ए बात के मोला बिक्कट खुशी हे। ए प्रकार के आयोजन ले अड़बड़ खुशी होथे। हमार संस्कार दृढ़ होथे अऊ अच्छा काम करे बर हम अऊ जादा संकल्पित होथन।
