पांचे घन्टा म 10 महिला स्व सहायता समूह मन ह करिस दू लाख रूपिया ले जादा के व्यापार

गौठान मन म बने जिनिस मन के होइस भक्‍कम बिक्री, महानदी वनिता के ब्रांडिंग मनखे मन ल अड़बड़ भावत हे
गढ़ कलेवा म मनखे मन ह मजा लीन ठेठरी, फरा, चीला अऊ बरा के सुवाद, 5 घन्टा म 40 हजार ले जादा के बिक्री
बलौदाबाजार, जिला स्तरीय छत्तीसगढ़ राज्योत्सव के दिन गौठान मन म संचालित महिला स्व सहायता समूह मन कोति ले बनाव गए जिनिस मन ह मनखे मन ल अड़बड़ भाईस। पांचे घंटा के भीतर 10 महिला स्व सहायता समूह मन ह करीबन 2 लाख रूपिया ले जादा के व्यापार करिन। कई ठन महिला समूह मन ह अपन समान मन ल स्टॉल म बिक्री बर सजाए रहिन। जेन ल आम मनखे अऊ जनप्रतिनिधि मन ह हाथों हाथ बिसा लीन। पंडित चक्रपाणि स्कूल स्थित मैदान म आयोजित कार्यक्रम म संझा 5 बजे दुकान मन ल खोले गीस अऊ रात 9 बजे तक सबो समान के बिक्री हो गए रहिस।
जिला पंचायत सीईओ डॉ फरिहा आलम सिद्की ह आज बताइस कि विकासखंड सिमगा के 3, बिलाईगढ़ के 4 पलारी के 1, भाटापारा के 1 अऊ कसडोल के 1 महिला स्व सहायता समूह सामिल रहिन। जेमां सिमगा के एकता महिला स्व सहायता समूह नवापारा ह 25 हजार 1 सौ रूपिया अऊ जय माँ दुर्गा स्व सहायता समूह मटिया ह 35 हजार के गोबर के दीया बेचिस। वइसनहे रानी लक्ष्मी बाई महिला स्व सहायता समुह हिरमी ह माटी, बांस अऊ जूट के बने 15 हजार उत्पाद बेचे हे। बिलाईगढ़ के निशा समूह बेलटिकरी ह 15 हजार रूपिया के अगरबत्ती, नवा किरण समहू गिरवानी ह गोबर के दीया 25 हजार 3 सौ रूपिया, सरस्वती समूह कोट ह बैग 15 हजार 2 सौ रूपिया अऊ प्रिय दुर्गा समूह गिरवानी ह 12 हजार 6 सौ के निरमा बेचे हे। पलारी के सहारा महिला स्व सहायता समूह टीला ह गोबर के दीया, धूप अऊ मूर्ति के 15 हजार रूपिया, महतारी महिला स्व सहायता समूह गुड़ेलिया ह माटी के दीया 31 हजार अऊ अटल चौक महिला स्व सहायता समूह मटिया ह 12 हजार रूपिया के अगरबत्ती बेचे हे। अइसनहे कुल 2 लाख 12 सौ रूपिया के उत्पाद बेचे गए हे। महिला स्व सहायता समूह के सदस्य अपन उत्पाद मन के बिक्री ले अड़बड़ खुश हें।
सहारा महिला स्व सहायता समूह के अध्यक्ष अरुणा यादव ह बताइस कि देवारी के पहिली एकर जइसे कार्यक्रम के आयोजन ले हमार उत्पाद बड़ सँख्या म मनखे मन ल पसंद आए हे। ए उत्पाद मन के बिक्री ले हमला अकतहा आमदनी होए हे। जानबा हे कि जिला प्रशासन ह ए उत्पाद मन ल एक रूपता प्रदान करे बर महानदी वनिता के नाम ले ब्रांडिंग करे हे। संगेच एक महानदी वनिता के नाम ले आउटलेट जिला मुख्यालय स्थित बुनियादी स्कूल तीर बनाय गए हे। जेखर संचालन लउहे चालू होवया हे। जेमां म जिला के गौठान मन अऊ महिला स्व सहायता समूह मन कोति ले उत्पाद के विक्रय करे जाही। अवइया समय मे ए दुकान मन के विस्तार सबो विकासखंड मुख्यालय मन तक करे के लक्ष्य निरधारित हे। एखर संगेच अभी हाल म जिला के चुने गए गौठान मन के चुने गए महिला स्व सहायता समूह मन ल जिला पंचायत कोति ले प्रशिक्षण देके ओ मन ल आत्मनिर्भर बनाए के दिशा म आगे कदम बढ़ाए गए हे। कलेक्टर सुनील कुमार जैन ह महिला स्व सहायता समूह मन ल अऊ गढ़ कलेवा के संचालन समिति ल ये उपलब्धि बर बधाई देहे हें।