दुर्ग, 29 अप्रैल 2020। लॉक डाउन के समय फंसे मनखे मन बर निगम भिलाई ह बेहतर व्यवस्था करे हे ताकि राहत शिविर अउ आश्रय स्थल म रहत ये मन ल घर जइसे माहौल मिल सकय। इंकर तनाव ल दूर करे बर इमन ल योग अउ व्यायाम घलोक सिखाए जात हे। आकाशगंगा कार्यालय स्थित भवन ल राहत शिविर बनाए गए हे जिहां तमाम सुविधा जे दैनिक जीवन बर उपयोगी हे मुहैया कराए गए हे। सोशल डिस्टेंस मेंटेन करे बर निगम भिलाई ह राहत शिविर अउ आश्रय स्थल मन म संख्या क्षमता के आधार म लॉक डाउनलोड म फंसे मनखे मन ल रखे जात हे, निरधारित संख्या पूरा होए म आन स्थल म व्यवस्था बनाय जात हे।
इही तारतम्य म सेक्टर 6 स्थित अग्रसेन भवन म रूके, जेवन अउ सफाई व्यवस्था के तैयारी करे जात हे एखर बर कार्यपालन अभियंता सुनील जैन ह आदेश घलोक जारी कर देहे हे अऊ अधिकारी/कर्मचारी मन के नियुक्ति घलोक कर देहे हें। आकाशगंगा स्थित राहत शिविर म कुल 21 मनखे रूके हें जेन 28 मार्च ले इहां रहत हें। ये मा ले 7 मनखे उत्तर प्रदेश अउ 14 मनखे पश्चिम बंगाल के हें। इहां इंकर समय व्यतीत करे बर टेलीविजन के व्यवस्था करे गए हे। चादर, मच्छरदानी, मास्क अउ सैनिटाइजर देहे गए हे एखर संगेच इहां पेयजल अउ शौचालय के घलव व्यवस्था हे। नेहरू भवन स्थित आश्रय स्थल म महिला स्व सहायता समूह के हेमलता अउ बुद्धेश्वरी ह रूके मनखे मन बर भोजन के सुग्घर इंतजाम करत हे अऊ चाय, नाश्ता संग खाना देहे जात हे। इहां 30 मार्च ले 16 मनखे रहत हें जिंकर बर टेलीविजन, पंखा, कूलर, मच्छरजाली आदि के व्यवस्था मौजूद हे अऊ मास्क अउ सैनिटाइजर घलोक देहे गए हे। बहुत अकन अइसे सामाजिक संगठन अउ समाजसेवी हें जे मन इंकर बर राशन उपलब्ध कराके सहयोग करत हें। रूके मनखे मन के चिकित्सीय परीक्षण घलोक करे जात हे। सोशल डिस्टेंस मेंटेन करे बर सबो ल अलग-अलग दूरी बनाके रहे के समझाइश सरलग देहे जात हे। राहत शिविर अउ आश्रय स्थल मन म रोजेच सैनिटाइजिंग के काम सोडियम हाइपोक्लोराइट ले करे जात हे अऊ शौचालय संग परिसर के नियमित सफाई करे जात हे।
