विश्व आदिवासी दिवस: सामाजिक समरसता म सामिल होइन मुख्यमंत्री
40 करोड़ रूपिया के 126 विकास काम मन के लोकार्पण-शिलान्यास
कांकेर, मुख्यमंत्री श्री भूपेश बघेल ह कहिन के पेसा कानून म ग्रामसभा ल जेन अधिकार देहे गए हे तेखर जानकारी देहे खातिर जनजागरण अभियान चलाए जाही। मुख्यमंत्री आज कांकेर जिला के तहसील मुख्यालय चारामा म विश्व आदिवासी दिवस उपर आयोजित सामाजिक समरसता सम्मेलन ल सम्बोधित करत रहिन। मुख्यमंत्री श्री भूपेश बघेल ह ये बेरा म 40 करोड़ 05 लाख रूपिया के 126 कई ठन विकास काम मन के भूमिपूजन अऊ लोकार्पण करिन। एमां 18 करोड़ 13 लाख रूपिया के 98 काम मन के भूमिपूजन अऊ 21 करोड़ 92 लाख रूपिया के 28 काम मन के लोकार्पण सामिल हे।
मुख्यमंत्री श्री भूपेश बघेल ह सामाजिक समरसता सम्मेलन ल संबोधित करत कहिन कि आजादी के लड़ाई म आदिवासी समाज ह महत्वपूर्ण भूमिका निभाए हे। 09 अगस्त के विश्व आदिवासी दिवस मनाए जाथे, इही दिन महात्मा गांधी ह अंग्रेज भारत छोड़ो के नारा देहे रहिन। कांकेर जिला के अमर शहीद गेंदसिंह, इन्दरू केंवट, पातर हल्बा ह घलोक आजादी के लड़ाई म अपन योगदान देहे हे। भारतीय संविधान के निर्माण म घलोक ठाकुर रामप्रसाद पोटाई के भूमिका रहे हे। आज हम स्वतंत्र हन, आजादी के 75वां वर्षगांठ मनावत हन। ये आजादी हमला हमार पुरखा मन के त्याग अऊ बलिदान ले मिले हे। देश के निर्माण म हमार पुरखा मन के योगदान हे, एक-एक मनखे ह देश के नवनिर्माण म अपन भूमिका निभाए हें। हमला सचेत रहि के संविधान के पालन करत आगू बढ़ना होही। उमन कहिन कि संविधान के तहत् हमला अधिकार देहे गए हे। हम सब संविधान के तहत ही संचालित होवत हन।
मुख्यमंत्री श्री भूपेश बघेल ह कहिन कि छत्तीसगढ़ सरकार कोति ले पेसा कानून के नियम बना दे गए हे, जेन ल गजट म प्रकाशित करे जा चुके हे। ये कानून म ग्रामसभा ल ताकत दहे गए हे, गांव के सबो मनखे मिलके ग्राम हित म फैसला लेहीं। ये कानून ले कोनो मनखे ल डेराए के जरूरत नइ हे। अनुसूचित जाति, अनुसूचित जनजाति, महिला वर्ग सबो ल अधिकार देहे गए हे, सब मिलके मनखे मन के हित म फैसला लेहीं। उमन कहिन कि पेसा कानून नियम म ग्रामसभा ल देहे गये अधिकार के जानकारी देहे अऊ जनजागरूकता बर जनजागरण अभियान चलाए जाही। उमन कहिन कि छत्तीसगढ़ सरकार शिक्षा, स्वास्थ्य, रोजगार ले लेके संस्कृति के संरक्षण बर सरलग काम करत हे। हमर बोली, भाखा, संस्कृति उपर हमला गरब हे, आदिवासी संस्कृति ल बचाए रखे बर देवगुड़ी, घोटुल निर्माण करे जात हे। कांकेर जिला म 05 करोड़ 94 लाख रूपिया के 118 देवगुड़ी अऊ 06 करोड़ 34 लाख रूपिया के 91 घोटुल स्वीकृत करे गए हे। मुख्यमंत्री ह कहिन कि शिक्षा के क्षेत्र म स्वामी आत्मानंद अंगरेजी माध्यम स्कूल खोले जात हे, जेकर मांग बहुत बाढ़ गए हे, प्रदेश म 279 अंगरेजी माध्यम के स्कूल खोले गए हे।
कांकेर जिला म नवा मेडिकल कॉलेज के स्थापना करे गए हे। किसान मन के करजा माफ करे गए हे। राजीव गांधी किसान न्याय योजना के तहत किसान मन ल इन्पुट सब्सिडी देहे जात हे। ये योजना के तहत् दूसर किस्त के राशि अवईया 20 अगस्त ल जारी कर देहे जाही। सरकार कोति ले ग्रामीण भूमिहीन कृषि मजदूर मन ल हर साल 07 हजार रूपिया के सहायता देहे जात हे। उमन कहिन कि राज्य सरकार सबो वर्ग के हित म काम करत हे।
मुख्यमंत्री श्री भूपेश बघेल ह चारामा विकासखण्ड के ग्राम जेपरा के बांधापारा म 300 मीटर सीसी रोड निर्माण बर 06 लाख रूपिया अऊ दू किलोमीटर डब्ल्यू बीएम सड़क बर 20 लाख रूपिया अऊ जेपरा के खासपारा म 300 मीटर सीसी रोड निर्माण बर 06 लाख रूपिया अऊ बरकछार के जुर्रीपारा म 300 मीटर सीसी रोड निर्माण बर 06 लाख रूपिया, चारामा विकासखण्ड के ग्राम कसावाही, सराधुनवागांव अऊ लखनपुरी के गौठान ल मल्टी एक्टीविटी केन्द्र के रूप म विकसित करे 20 लाख रूपिया, भानुप्रतापपुर विकासखण्ड के ग्राम चिल्हाटी के गौठान म मिलेट प्रसंस्करण-(कोदो, कुटकी, रागी) प्रसंस्करण अऊ लेयर फार्मिंग बर 13 लाख रूपिया अऊ दुर्गूकोंदल विकासखण्ड के लोहत्तर गौठान म कृषि यंत्र सेवा केन्द्र अऊ मल्टी एक्टीविटी बर 17 लाख रूपिया स्वीकृत करे के घोषणा करिन।
कार्यक्रम ल छत्तीसगढ़ विधानसभा के उपाध्यक्ष श्री मनोज मण्डावी, संसदीय सचिव अऊ कांकेर विधानसभा के विधायक श्री शिशुपाल शोरी, गौ-सेवा आयोग के सदस्य श्री नरेन्द्र यादव, सर्व आदिवासी समाज के अध्यक्ष श्री जीवन ठाकुर ह घलोक संबोधित करिन। ये बेरा म छत्तीसगढ़ अनुसूचित जनजाति आयोग के सदस्य श्री नितिन पोटाई, छत्तीसगढ़ पर्यटन मण्डल के सदस्य श्री नरेश ठाकुर, जिला पंचायत अध्यक्ष श्री हेमंत ध्रुव, बस्तर विकास प्राधिकरण के सदस्य श्री बीरेश ठाकुर, जिला पंचायत उपाध्यक्ष श्री हेमनारायण गजबल्ला, जिला पंचायत के पहिली अध्यक्ष श्रीमती सुभद्रा सलाम, कमिश्नर श्री श्याम धावड़े, पुलिस महानिरीक्षक श्री सुन्दरराज पी., कलेक्टर कांकेर डॉ. प्रियंका शुक्ला, पुलिस अधीक्षक श्री शलभ कुमार सिन्हा संग आदिवासी समाज प्रमुख, प्रशासन के अधिकारी अऊ नागरिकगण बड़ संख्या म मौजूद रहिन।
