स्वास्थ्य सेवा के संचालक ह करिन कोविड केयर सेंटर अऊ होम आइसोलेशन म इलाज करात मरीज मन के कांउसिलिंग व्यवस्था के करिन समीक्षा
रायपुर, 25 सितंबर 2020। स्वास्थ्य सेवा के संचालक श्री नीरज बंसोड़ ह प्रदेश के कोविड अस्पताल, कोविड केयर सेंटर अऊ होम आइसोलेशन म इलाज करात मरीज मन के काउंसिलिंग के व्यवस्था के समीक्षा करिन। उमन कोविड-19 के मरीज मन ल तनाव, चिंता, उदासीनता अऊ अवसाद ले मुक्त रखे ऊंखर मानसिक स्वास्थ्य के देखभाल उपर जोर दीन। श्री बंसोड़ ह ऑनलाइन समीक्षा बैठक म सबो जिला के मुख्य चिकित्सा अऊ स्वास्थ्य अधिकारी, जिला कार्यक्रम प्रबंधक, राष्ट्रीय मानसिक स्वास्थ्य कार्यक्रम के जिला नोडल अधिकारी, साइकेट्रिस्ट, वीकेएन प्रशिक्षित चिकित्सक, सामुदायिक अऊ साइकेट्रिक नर्स, क्लिनिकल साइकोलॉजिस्ट्स अऊ साइकेट्रिक सोशल वर्कर मन ल कोरोना संक्रमित मन के मानसिक स्वास्थ्य के देखभाल के संबंध म जरूरी दिशा-निर्देश दीन।
संचालक, स्वास्थ्य सेवाएं ह बैठक म क्वारंटाइन अऊ आइसोलेशन म रहत मनखे मन म मानसिक तनाव दूर करे बर ऑडियो-विजुअल माध्यम ले मनोरंजन के सुविधा प्रदान करे के निर्देश दीन। उमन कोविड-19 मरीज मन के मानसिक स्वास्थ्यगत समस्या मन के निवारण बर टेलीफोनिक परामर्श बर हर जिला म फोन नम्बर जारी करे ल कहिन। श्री बंसोड़ ह सबो कोविड केयर सेंटर मन म कम से कम एक तकनीकी स्टॉफ के ड्यूटी लगाय के निर्देश दीन जेखर से के मानसिक समस्या ले जूझत मरीज मन के पहिचान करे जा सकय। उमन सबो जिला मन मे एन्जायटी अऊ डिप्रेशन के दवइ मन के उपलब्धता बहुत मात्रा म सुनिश्चित करे ल कहिन। स्वास्थ्य सेवा के संचालक ह जिला मानसिक स्वास्थ्य टीम ल हर एक विकासखंड म आत्महत्या के प्रयास करइया मनखे के समय-समय म अनिवार्य रूप ले काउंसलिंग करे के निर्देश दीन। उमन साइकोलॉजिकल फर्स्ट-एड बर आइसोलेशन वार्ड मे पदस्थ सबो स्टॉफ ल अवइया अकटूबर महीना म प्रशिक्षण देहे के बात कहिन।
समीक्षा बैठक म अधिकारी मन ह बताइन के कोरोना काल म मनखे मन म तनाव, एंग्जायटी, उदासीनता, अवसाद जइसे मानसिक विकार म बढ़ोतरी हो गए हे। छतीसगढ़ म घलोक इंकर मामला बढ़े हे। प्रदेश के सबो जिला मन म राष्ट्रीय मानसिक स्वास्थ्य कार्यक्रम के अंतर्गत मरीज मन ल काउंसलिंग सुविधा प्रदान करे जात हे। निमहंस बंगलुरु कोति ले प्रशिक्षित चिकित्सा अधिकारी मन अऊ आर.एम.ए. मन कई जिला मन म कोविड-19 के मरीज मन के काउंसलिंग करत हें। जिला मानसिक स्वास्थ्य टीम ह मनखे मन के बीच कई मानसिक अवस्था मन के जानकारी अऊ मानसिक तनाव कम करे के उपाय मन के प्रचार-प्रसार करत हें। मैदानी अमला मन ह कोविड केयर सेंटर्स अउ होम आइसोलेटेड मरीज मन अऊ ऊंखर परिवार के सदस्य मन के काउंसलिंग रिपोट हर हफ्ता राज्य कार्यालय ल भेजत हें।
