- फिजियो थेरेपी उपचार ले मरीज मन ल मिलत हे नवा जीवन
कोण्डागांव, कोण्डागांव म जिला प्रशासन के अभिनव पहल के तहत् गांव गांव म जा के गंभीर बीमारी ले ग्रसित मनखे मन ल घर-घर जा के फिजियो थेरेपी उपचार फिजियो थेरेपी तुमचो दुआर योजना अंतर्गत करे जात हे। जेखर तहत् जिला के ग्राम उमरगांव-अ के निवासी 68 वर्षीय लकवा मारे रामलाल सोरी के घलोक उपचार करे गीस। जेखर से महिनों के असक रामलाल ल नवा जिन्दगी मिल गए हे।
ये संबंध म रामलाल के बेटा ह बताइस कि रामलाल ह पाछू करीबन सात-आठ महीना ले लकवा ग्रस्त रहिस। जेखर सेती वोखर शरीर के जेवनी बाजू ह काम करना पूरा बंद कर देहे रहिस। गरीबी म जीवनयापन करइया ये परिवार तीर बड़े शहर म जा के उहां के मंहगा अस्पताल मन म उपचार कराना संभव नइ रहिस। अइसन म ओ ह चले फिरे म असमर्थ हो गये रहिस तेला वो ह अपन नियती समझ ले रहिस। ओ ह अपन पांव म फेर खड़े होवइ ल एक सपना मान बइठे रहिस। ये अवस्था म वोखर घर वाले मन वोखर जम्मो दैनिक काम मन ल करत रहिन।
इही बेरा म जिला के फिजियो थेरेपी तुमचो दुआर टीम ल ग्राम के मितानिन के माध्यम ले मरीज रामलाल के जानकारी मिलीस। फिजियो थेरेपी टीम चिकित्सक के संग 22 सितंबर के मरीज के घर ग्राम उमरगांव पहुंचीन। जिहां चिकित्सक मन जांच करके मरीज के स्थिति ल देखत फिजियो थेरेपी करे के सलाह दीन। जेमा फिजियोथैरेपिस्ट ह रोजाना कसरत करे के सलाह दीन।
ये संबंध म फिजियोथैरेपिस्ट पदम बघेल ह बताइस कि जागरूकता के अभाव म कसरत के सलाह ल पहिली तो मरीज अऊ ओखर परिजन मन अनदेखा कर दीन। दुसरइया पईत 27 अकटूबर के फिजियो थेरेपी के टीम मरीज के घर फेर पहुंच के समझाइश दीस तब फेर से उपचार बर कसरत सिखात दिन म दू पइत कसरत कराए के सलाह देहे गीस। तीसर पइत 24 नवंबर के जब फिजियोथेरेपी के टीम मरीज के घर पहुंचिस त मरीज के स्वास्थ्य म काफी सुधार आ चुके रहिस। रामलाल खुद चले फिरे लगे रहिस संगेच ओखर हाथ म हरकत घलोक चालू हो गए रहिस।
एखर बाद चौथइया पइत 29 दिसंबर के घर जाय म टीम घलोक अचरज ले भर गे जब उमन देखिन के मरीज के हालत म 90 प्रतिशत तक सुधार हो चुके हे। अब वो खुदे खेती बाड़ी के काम मन म हाथ बटाना चालू कर देहे हे। जेन ल देखत दल के पहुंचे म परिजन मन ह प्रसन्नता जाहिर करत बताइन कि उमन रामलाल के ठीक होए के उम्मीद छोड़ देहे रहिन, अइसन म फिजियो थेरेपी तुमचो दुआर हमार बर एक वरदान साबित होइस। आज रामलाल अपन दैनिक जीवन के करीबन सब्बो काम खुद करे म सक्षम हो गे हे।
कलेक्टर पुष्पेन्द्र कुमार मीणा के मार्ग दर्शन म घर-घर जाके फिजियो थेरेपी के माध्यम ले लकवा, जोड़ के दरद, हड्डि के दरद आदि जुन्ना अउ गंभीर मरीज मन के मशीन अउ कसरत के सहारे उपचार करे जात हे। कुछ मनखे मन के स्वस्थ होए के बाद अब गांव वाले मन म फिजियो थेरेपी ले उपचार के प्रति विश्वास बढ़त जात हे। चिकित्सालय मन म उपचार के बाद परेशान गंभीर बीमारी के मरीज मन बर फिजियोथेरेपी तुमचो द्वार वरदान साबित होवत हे। जेन मरीज मन के उपचार ले पहिली बिस्तर ले उठना नामुमकिन रहिस, ओ मन फिजियो थेरेपी ले उपचार के बाद स्वस्थ होवत हें। फिजियो थेरेपी ले अब तक कुल 1130 मनखे मन के उपचार करे गए हे। जेमां ले करीबन 450 मरीज 90 प्रतिशत ले जादा ठीक हो गे हे।
