पिछड़ा आदिवासी मन के कल्याण बर काम करव : राज्यपाल सुश्री उईके

रायपुर, राज्यपाल सुश्री अनुसुईया उईके ह आज बिलासपुर जिला के पेण्ड्रा म आदिवासी नेता अऊ स्वतंत्रता संग्राम सेनानी बिरसा मुण्डा के 114वां जयंती अऊ आदिवासी मन के मसीहा डॉ. भंवर सिंह पोर्ते के 26 वां पुण्यतिथि म आयोजित जनजातीय गौरव दिवस कार्यक्रम म कहिन कि बिरसा मुण्डा ह समाज के शोषित, पीड़ित, मनखे मन के हमेशा मदद करे हें, अऊ समाज ल जागरूक करे के उदीम करे हें।
ये बेरा म राज्यपाल सुश्री उईके ह कहिन कि आदिवासी मन के कल्याण बर भारतीय संविधान म बहुत अकन प्रावधान करे गए हे। जनजाति समाज ल अन्याय अऊ अत्याचार ले बचाय के सुरक्षा कवच राष्ट्रीय जनजाति आयोग हे। एखर तहत आदिवासी मन के कल्याण बर बहुत अकन काम करे हे। उमन संविधान के 5वीं अनुसूची के तहत राज्यपाल ल देहे गए अधिकार ल अवगत कराइन।
कार्यक्रम के अध्यक्षता करत राष्ट्रीय अनुसूचित जनजाति आयोग के अध्यक्ष श्री नंदकुमार साय ह कहिन कि बिरसा मुंडा, शहीद वीर नारायण सिंह अऊ गुंडाधुर ह देश के आजादी बर अपन बलिदान दीन। उंखर से हमला हमेशा प्रेरणा मिलथे। केन्द्रीय राज्यमंत्री श्री फगन सिंह कुलस्ते ह कहिन कि डॉ.भंवर सिंह पोर्ते ह अपन राजनैतिक जीवन के संग सामाजिक क्षेत्र मन म काम करिन। ओ मन मध्यप्रदेश मंत्रिमंडल म कई ठन पद म रहिन। ओ मन ल जऊन जिम्मेदारी मिलीस, ओखर बखूबी निर्वहन करिन। कार्यक्रम म स्व.डॉ.भंवर सिंह पोर्ते के पत्नि श्रीमती अर्चना पोर्ते ह राज्यपाल ल चिनहा भेंटकरके सम्मानित करिन। ये बेरा म स्व.पोर्ते के परिवार के सदस्य मन अऊ बड़ संख्या म नागरिक मौजूद रहिन।