- अधूरा काम मन ल लउहे पूरा करे के निर्देश
- नाला बंधान कार्य मन म स्थानीय गांव वाले मन के सुझाव लेहे जाही
- जनप्रतिनिधि अपन क्षेत्र मन के गौठान मन के करव निरीक्षण
- दुनों प्राधिकरण के सदस्य मन ले नवा कार्य मन के प्रस्ताव आमंत्रित
- आचार संहिता के चलत शहरी क्षेत्र मन के नइ करे गीस समीक्षा
रायपुर, मुख्यमंत्री श्री भूपेश बघेल के अध्यक्षता म आज इहां ऊंखर निवास कार्यालय म छत्तीसगढ़ राज्य ग्रामीण अउ आन पिछड़ा वर्ग क्षेत्र विकास प्राधिकरण अऊ अनुसूचित जाति विकास प्राधिकरण के समीक्षा बैठक रखें गीस। बैठक म दुनों प्राधिकरण मन ले स्वीकृत करे कार्य मन के प्रगति के समीक्षा करे गीस। मुख्यमंत्री ह अधूरा निर्माण कार्य मन ल गुणवत्ता के संग जल्दी से जल्दी पूरा करे के निर्देश दीन। नगरीय निकाय मन के निर्वाचन के आचार संहिता ल देखत ए दुनों प्राधिकरण म अवइया शहरी क्षेत्र मन के समीक्षा नइ करे गीस।
मुख्यमंत्री ह कहिन कि राज्य सरकार के महत्वाकांक्षी सुराजी ग्राम योजना के अंतर्गत गांव मन म आदर्श अऊ दर्शनीय गौठान मन के निर्माण सुनिश्चित करे जाए। उहां मापदंड के मुताबिक सबो व्यवस्था सुनिश्चित करे जाए। मुख्यमंत्री ह जनप्रतिनिधि मन ले घलोक अपन-अपन क्षेत्र मन म बनत गौठान मन के सतत रूप ले निरीक्षण करे के आग्रह करिन। बैठक म ये प्रस्ताव सर्वसम्मति ले पारित करे गीस कि केन्द्र सरकार ले सीएसआर के नियम मन म संशोधन करे के आग्रह करे जाए। बैठक म प्राधिकरण के सदस्य मन ह कहिन कि सीएसआर के काम मन म पारदर्शिता सुनिश्चित करे बर स्थानीय जनप्रतिनिधि मन ल ये मद ले स्वीकृत कार्य मन ल मंजूरी देवइया समिति म सामिल करे जाए। जेखर से सीएसआर मद ले स्थानीय जरूरत वाले कार्य मन ल स्वीकृति दीए जा सकय। मुख्यमंत्री ह दुनों प्राधिकरण के सदस्य मन ले अवइया दस दिन म नवा प्रस्ताव देहे के आग्रह करिन।
मुख्यमंत्री ह बैठक म कहिन कि गांव मन म ग्राम पटेल मन के नियुक्ति करे जाय अऊ ओ मन ल नरवा, गरवा, घुरूवा अऊ बाड़ी योजना ले जोड़े जाय। बैठक म मिनी माता स्वावलंबन योजना अऊ किसान मन के असाध्य सिंचाई पंप मन के विद्युतीकरण के काम के प्रगति के समीक्षा करे गीस। मुख्यमंत्री ह नरवा योजना के अंतर्गत भूमिगत जल रिचार्ज करे अऊ सतही जल ल रोके बर नाला बंधान अऊ छोटे डेम के कार्य मन ल प्राथमिकता ले करे के निर्देश दीन। उमन कहिन कि ये काम म इसरो के मदद ले तियार करे गए सेटेलाइट नक्शा मन के उपयोग करे जाए अऊ बंधान काम म स्थानीय गांव वाले मन के सुझाव घलोक लेहे जाए। मुख्यमंत्री ह कहिन कि प्रदेश म 30 हजार नरवा हे। अभी हाल म 1028 नरवा के डीपीआर तियार कर ले गए हे।
बैठक म गृह मंत्री श्री ताम्रध्वज साहू, कृषि मंत्री श्री रविन्द्र चौबे, पंचायत मंत्री श्री टी.एस. सिंहदेव, आदिम जाति कल्याण मंत्री डॉ. प्रेमसाय सिंह, नगरीय प्रशासन मंत्री डॉ. शिव कुमार डहरिया, उद्योग मंत्री श्री कवासी लखमा, राजस्व मंत्री श्री जयसिंह अग्रवाल, महिला अउर बाल विकास मंत्री श्रीमती अनिला भेंड़िया, जादा शिक्षा मंत्री श्री उमेश पटेल, खाद्य अउर नागरिक आपूर्ति मंत्री श्री अमरजीत भगत, लोक स्वास्थ्य यांत्रिकी मंत्री श्री गुरू रूद्र कुमार, सांसद श्रीमती ज्योत्सना महंत, सांसद श्रीमती छइंहा वर्मा, श्री गुहाराम अजगले अऊ श्री संतोष पाण्डेय संग दुनों प्राधिकरणों के सदस्य, मुख्य सचिव श्री आर.पी. मंडल, अपर मुख्य सचिव श्री अमिताभ जैन, पंचायत अउ ग्रामीण विकास विभाग के प्रमुख सचिव श्री सुब्रत साहू, मुख्यमंत्री के प्रमुख सचिव श्री गौरव द्विवेदी, संग संबंधित अधिकारी उपस्थित रहिन।