दुर्ग, टिकरी (अर्जुंदा) म इतवार के दिन, तिजहारिन बहिनी मन के सम्मान म पीहर महोत्सव के आयोजन करे गए रहिस। ये आयोजन म गुंडरदेही विधानसभा के लोकप्रिय विधायक श्री कुंवर सिंह निषाद मुख्य अतिथि के रूप म संघरिन। ये कार्यक्रम के अध्यक्षता श्री रितेश देवांगन करिन अउ विशेष अतिथि श्री गिरधर देवांगन रहिन। गुंडरदेही विधायक खुदे ये बेरा म आए सबो बहिनी मन के सम्मान करिन अऊ कहिन कि ये आयोजन तीजा म आए बहिनी मन के प्रेम अऊ सम्मान के चिन्हारी ये।
रितेश देवांगन के परिकल्पना अऊ उदीम ले ये आयोजन अपन तरा के अलगेच आयोजन रहिस। अइसनहे नगर पंचायत अर्जुंदा म गुंडरदेही विधायक श्री कुंवर सिंह निषाद जी कोति ले तीजा महोत्सव के आयोजन करे गीस रहिस जेमा पारंपरिक नगर पंचायत अर्जुंदा अऊ तीर-तखार के गांव के बहिनी मन ‘करू भात’ खवाए गीस। विधायक गुंडरदेही खुदे बहिनी मन ल खाना परोसे रहिन।छत्तीसगढि़या संस्कृति के प्रचार-प्रसार के उद्देश्य ले अवइया बछर म अइसन आयोजन के देखा-सीखी प्रदेश के कई जगा ‘पीहर महोत्सव’ ‘मईके तिहार’ जइसे आयोजन के सुरूवात होही। कार्यक्रम म गांव के जमो सियान मनखे अऊ बहिनी-दाई मन सकलाए रहिन।
