75 आदिवासी महिला किसान मन ल देहे गीस दुधारू गाय
राज्य के छै जिला मन म दुधारू पशु प्रदाय योजना के पायलट प्रोजेक्ट शुरू
आदिवासी समुदाय के महिला किसान मन ल आत्मनिर्भर अऊ सशक्त बनाए खातिर राज्य शासन के नवा पहल
कांकेर, आदिवासी समुदाय के महिला किसान मन के आय बढ़ाय अऊ ऊंखर सशक्तीकरण बर राज्य शासन कोति ले दुधारू पशु प्रदाय योजना चालू करे जात हे। राज्य के छै जिला कांकेर, कोंडागांव, महासमुंद, सारंगढ़-बिलाईगढ़, जशपुर अऊ बलरामपुर-रामानुजगंज म एकर पायलट प्रोजेक्ट शुरू करे गए हे। योजना के तहत आजीविका संवर्धन, पोषण सुधार अऊ आत्मनिर्भरता ल बढ़ावा देहे आदिवासी महिला किसान मन ल साहीवाल नस्ल के दू-दू दुधारू गाय देहे जात हे। राष्ट्रीय डेयरी विकास बोर्ड (एनडीडीबी) के सहायक संस्था एनडीडीबी डेयरी सर्विसेस के सहयोग ले छत्तीसगढ़ राज्य दुग्ध महासंघ मर्यादित कोति ले ये योजना संचालित करे जात हे। योजना के तहत कांकेर जिला के बड़गांव (पखांजूर) म आयोजित कार्यक्रम म क्षेत्र के 75 आदिवासी महिला किसान मन ल गाय देहे गीस।
सांसद श्री भोजराज नाग ह दुधारू पशु प्रदाय कार्यक्रम ल मुख्य अतिथि के रूप म संबोधित करत कहिन के आदिवासी वर्ग के महिला मन ल दुधारू पशु देहे के ये योजना ओ मन ल आर्थिक रूप ले आत्मनिर्भर अऊ सशक्त बनाए के दिशा म बड़का कदम हे। वनांचल के महिला मन ल दुग्ध उत्पादन ले जोड़के समावेशी विकास कोति आगे बढ़ाए जाही, जेखर से ओ मन समृद्ध हो सकंय। विधायक श्री विक्रम उसेंडी ह घलोक गाय वितरण कार्यक्रम म सामिल होके महिला किसान मन ल बधाई अऊ शुभकामना दीन।
राज्य सरकार कोति ले ए योजना म 50 प्रतिशत तक अनुदान देहे जात हे, जबकि 40 प्रतिशत राशि छत्तीसगढ़ राज्य ग्रामीण बैंक के माध्यम ले रियायती ब्याज दर म ऋण स्वरूप प्रदान करे जात हे। बांचे 10 प्रतिशत राशि लाभार्थि मन कोति ले देहे जाही। ऋण के वसूली किसान मन से दूध के विक्रय ले करे जाही। डेयरी पूर्ण विकास योजना के अंतर्गत संचालित ए योजना म लाभार्थि मन ल एक साल तक मुफ्त सुविधा घलोक देहे जाही, जेमें दुधारू गाय मन के बीमा, पशु स्वास्थ्य निगरानी, साइलेज चारा, पौष्टिक आहार, खनिज मिश्रण अउ वैज्ञानिक पशु प्रबंधन म प्रशिक्षण सामिल हे। संगेच राज्य के पशु चिकित्सा टीम नियमित रूप ले पशु स्वास्थ्य सेवा अउ प्रजनन सुविधा घलोक उपलब्ध कराही।
75 आदिवासी महिला किसान मन ल देहे गीस दुधारू गाय
