जशपुर, मुख्यमंत्री श्री विष्णु देव साय ह स्व-सहायता समूह के महिला मन ला आर्थिक रूप ले मजबूत बनाय के निरदेस देहे हें। दही कड़ी म जशपुर जिला के मनोरा विकासखंड के ग्राम पंचायत मनोरा म रहइया श्रीमती पिंकी सोनी ह बिहान योजना के तहत महिला स्व-सहायता समूह ले जुड़े हावे। समूह म जुड़े के बाद ओमन ला सासन के योजना मन के जानकारी मिलिस अउ अपन गोड़ म खड़ा होय के मउका मिलिस।
पिंकी ह अपन किराना दुकान ला आगू बढ़ाय के सपना देखिस। ए सपना ला पूरा करे बर ओमन पीएम मुद्रा लोन के तहत 70 हजार रुपिया के ‘स्वयंसिद्धा लोन’ लीन अउ अपन दुकान ला बड़े करिन। दुकान बड़े होय ले न केवल ओखर कमाई बाढ़ीस, बल्कि ग्राहक मन के भरोसा अउ पहुँच घलो मजबूत होइस।
पिंकी सोनी ह कहिथे —
“समूह ले जुड़े के बाद मोर जिनगी म सुग्घर बदलाव आईस। छत्तीसगढ़ सासन के योजना मन के जानकारी मिलिस अउ आत्मनिर्भर बने के आतम-बिसवास घलो जागीस।”
आज पिंकी ह अपन परिवार के मजबूत आर्थिक सहारा बन गे हे। ओखर मेहनत अउ बिहान योजना ले मिले मदद ह ओला आत्मनिर्भरता के रद्दा देखाए हे। एखर बर ओमन मुख्यमंत्री श्री विष्णु देव साय ला धन्यबाद घलो देहे हें।
