पीपरछेड़ी सहकारी समिति के प्रबंधक यसवंत साहू निलंबित

टोकन वितरण म लापरवाही बरते के मामला

रायपुर, सेवा सहकारी समिति पीपरछेड़ी के समिति के प्रबंधक यशवंत कुमार साहू ल निलंबित कर देहे गए हे। जिला सहकारी केन्द्रीय बैंक दुर्ग के मुख्य कार्यपालन अधिकारी ह निलंबन के ये कार्यवाही समिति प्रबंधक के धान खरीदी बर किसान मन के टोकन वितरण के व्यवस्था म लापरवाही बरते के के कारन करे गए हे।
जानबा हे कि एक दिसम्बर ले सहकारी समितियां अउ उपार्जन केन्द्र मन म समर्थन मूल्य म धान खरीदी के व्यवस्था ल सुचारू रूप ले संचालन करे बर शासन कोति ले किसान मन ल नियमानुसार टोकन देहे के हुकुम शासन ह देहे हे। टोकन वितरण के ये काम समिति मन के धान उपार्जन के रोजे के क्षमता के मान ले देहे के हुकुम हे। समिति प्रबंधक पीपरछेड़ी यशवंत कुमार साहू ह शासन के ये हुकुम के उदूली करत लापरवाही बरतत रहिस। प्रबंधक ह 29 नवम्बर 2021 के पीपरछेड़ी समिति ले जुड़े सबो गांव मन म मुनादी करा के टोकन बर किसान मन ल बलवईस ते खातिर समिति म भीड़ उमड़ गे, जेखर से उहां अव्यवस्था के स्थिति पैदा हो गीस।
सेवा सहकारी समिति पीपरछेड़ी म टोकन लेहे बर बड़ संख्या म एके संग किसान मन के पहुंचे अऊ उहां अव्यवस्था के सूचना मिलतेच कलेक्टर श्री जनमेजय महोबे अऊ पुलिस अधीक्षक श्री सदानंद कुमार उहां पहुंचिन। उमन समिति म धान खरीदी के व्यवस्था मन के जायजा लीन। कलेक्टर के बताती समिति म अव्यवस्थित भीड़ के सेती घायल गांव वाले मन ल प्राथमिक उपचार के बाद छुट्टी दे देहे गए हे। सबो के स्थिति सामान्य हे।