- राज्य मन ल होवय गाइडलाइन म बदलाव के अधिकार
- अप्रेंटिसशिप पखवाड़ा म छत्तीसगढ़ के कौशल विकास मंत्री श्री पटेल ह दीन सुझाव
रायपुर, छत्तीसगढ़ के कौशल विकास, तकनीकी शिक्षा अऊ रोजगार मंत्री श्री उमेश पटेल ह आज नई दिल्ली के प्रवासी भारतीय केन्द्र म कौशल विकास अऊ उद्यमशीलता मंत्रालय कोति ले आयोजित कई राज्य मन के मंत्री मन के सम्मेलन अऊ अप्रेंटिसशिप पखवाड़ा के शुभारंभ के अवसर म राज्य म उद्यमशीलता अऊ राइट टू स्किल ल लेके कई सुझाव दीन। उमन राइट टू स्किल योजना के तहत युवा मन ल रोजगार देहे बर केंद्रीय स्तर म प्लेसमेंट सेल के गठन के बात कहिन। ये दौरान कौशल भारत अऊ कुशल भारत के निर्माण बर केंद्र सरकार कोति ले चलाए जात योजना मन ल अऊ कार्यक्रम मन के जानकारी दिए गीस।
उमन कहिन कि ये योजना के गाइडलाइन म बदलाव के अधिकार राज्य मन तीर घलोक होना चाही, जेखर से राज्य अपन जरूरत के मुताबिक बदलाव कर सकय। ये दौरान मंत्री श्री पटेल ह कहिन कि अगर डिमांड अऊ उद्योग मन के हिसाब ले राइट टू स्किल ल बनाय जाही त एला लागू करे म कई दिक्कत होही। कौशल के अधिकार अऊ उद्योग मन के मांग म विरोधाभास पैदा हो सकत हे। उमन कहिन एखर तहत देहे गए पाठ्यक्रम के घलोक जानकारी पहिली ही निरधारित होना चाही, जेखर से युवा अपन जरूरत अऊ प्राथमिकता के अनुसार स्किल के चुनाव कर सकयं। राज्य मन म राइट टू स्किल ल लागू करे म मशीनरी के दिक्कत आ सकत हे, जेकर कमी केंद्र ल दूर करना चाही। उहें, उमन कहिन कि केंद्रीय स्तर म प्लेसमेंट सेल के गठन होवय, जेखर से कई ठन राज्य मन के समन्वय ले जेमां जरूरत हो उहाँ युवा मन ल रोजगार मिल सकय।
सम्मेलन म कई ठन राज्य मन के मंत्री मन के अलावा केंद्रीय कौशल विकास अऊ उद्यमशीलता मंत्री महेंद्र नाथ पांडेय, राज्य मंत्री राजकुमार सिंह संग राज्य मन के प्रमुख सचिव सामिल रहिन।
