राजनांदगांव, जिला के डोंगरगढ़ विकासखंड के वनांचल ग्राम बोरतलाव म रहइया श्रीमती श्वेता बाई अऊ वोखर परिवार बर 27 मई के दिन हमेशा बर यादगार बन गीस। कइ बछर ले खपरा के कच्चा मकान म जीवन के कठिनाइ मन ले जूझत, वोखर परिवार ह कभू नइ सोचे रहिस के ओ ल एक दिन पक्का मकान नसीब होही। फेर प्रधानमंत्री आवास योजना ग्रामीण ह ये सपना साकार कर देखाइस।
श्रीमती श्वेता अऊ वोखर पति श्री रतन सिंह मजदूरी करके अपन परिवार के जीवन यापन करथे। संसाधन के कमी के कारन पक्का घर बनवाना वोखर बर सिरिफ एक सपना ही रह गए रहिस। ओखर जुन्ना घर बरसा म चूहय, भिथिया भींजे रहय अऊ कीरा-मकोरा ले परेशानी के सामना करना परत रहिस।
फेर अब परिस्थिति बदल गीस, प्रधानमंत्री आवास योजना के अंतर्गत मिले नवा पक्का मकान म जइसनहे गृह प्रवेश होइ, परिवार के आंखी म चमक अऊ चेहरा म मुस्कान देखे लायक रहिस। ए मौका म स्थानीय जनप्रतिनिधि मन के उपस्थिति म श्रीमती श्वेता बाई ह घर के दरवाजा म आमा के पाना के तोरन, रंग-बिरंग फुग्गा अऊ केरा के पाना ले सजावट करिस। घर ल एक मंदिर के जइसे सजाइस, काबर के वोखर बर ये घर सिरिफ ईंटा-पथरा के भिथिया नो हे, भलुक एक नवा शुरुआत के चिन्हारी ये।
श्रीमती श्वेता ह बताइस के वोला पक्का मकान अउ शौचालय के सुविधा घलोक योजना के अंतर्गत मिले हे। अब ओ ल अऊ वोखर परिवार ल स्वच्छता अऊ सुरक्षा दुनों के अहसास होवत हे। पहिली के चिंता ले अब राहत मिले हे, जेखर से ओ मन मजदूरी के काम निश्चिंत होके कर पात हें। गृह प्रवेश समारोह के समय भावुक होत श्रीमती श्वेता ह प्रधानमंत्री श्री नरेंद्र मोदी अऊ मुख्यमंत्री श्री विष्णुदेव साय ल हिरदे ले धन्यवाद दीस।
श्वेता बाई ल मिलिस पक्की छत, नवा आसा नवा भरोसा
