बालोद, प्रधानमंत्री आवास योजना भारत सरकार के एक बड़ कल्याणकारी योजना आय, जेकर उदेस बिना घर के अउ कच्चा मकान म रहइया जरूरतमंद मनखे मन ला (गांव अउ सहर म) पक्का मकान देवाए के हे। एकर तहत आर्थिक मदद अउ होम लोन के बियाज म सब्सिडी देहे जाथे। बालोद जिला के डौण्डीलोहारा विकासखंड के भीतरी आवइया गांव रेंगनी के रहइया श्रीमती उमा बाई बर प्रधानमंत्री आवास योजना ह एक नवा आस अउ खुसी के माध्यम बने हे। कइ बछर तक कच्चा मकान म दुख-तकलीफ के बीच अपन दिन कटइया वोकर परिवार ला अब एक सुरक्षित अउ सनमान वाले घर मिलगे हे।
बरसात के चार महिना परिवार ह डर अउ असुबिधा म बिताए बर रहिस मजबूर
उमा बाई ह बताथे के पहिली उनकर परिवार ह कच्चा घर म रहत रहिस, जिहां बरसात के दिन म छानी ले पानी चूहना आम बात रहिस। बरसात के चार महिना तक पूरा परिवार ह डर अउ असुबिधा के बीच अपन दिन काटे बर मजबूर रहत रहिस। हर बछर बरसात के पहिली मकान के खपरा लहुटई अउ भितिया मन के मरम्मत कराए बर परत रहिस, जेकर से पइसा के बोझा घलो बाढ़ जावत रहिस। कमजोर आर्थिक स्थिति के सेती पक्का मकान के सपना सिरिफ एक संउख बनके रह गे रहिस।
कइ बछर जुन्ना सपना होइस पूरा
इही बीच प्रधानमंत्री आवास योजना ह उनकर जीवन म आसा के नवा अंजोर लेके आइस। बछर 2024-25 म उनकर आवास ला मंजूरी मिलिस अउ मकान बनाए बर सरकार ले 1 लाख 20 हजार रुपिया के मदद मिलिस। ए सहयोग ले उनकर कइ बछर जुन्ना सपना सच होइस अउ आज उनकर परिवार ह एक मजबूत अउ सुरक्षित पक्का मकान म रहत हे।
जीवन म आत्म-बिसवास अउ सनमान बाढ़िस
नवा घर म रहे के बाद परिवार के जीवन म बड़ बदलाव आए हे। अब बरसात के दिन म कोनो किसम के चिंता नइ रहय अउ पूरा परिवार सुरक्षित माहौल म सुख वाले जीवन बितावत हे। पक्का मकान मिले ले उनकर जीवन म आत्म-बिसवास अउ सनमान के भाव घलो बाढे हे।
परिवार के सुघर भबिस बर मजबूत नेव तियार होइस
श्रीमती उमा बाई ह प्रधानमंत्री श्री नरेंद्र मोदी अउ मुख्यमंत्री श्री विष्णु देव साय के आभार जतावत कहिन के सरकार के जन-कल्याणकारी योजना ह उनकर परिवार ला नवा पहिचान अउ सुरक्षित जीवन देहे हे। वोमन कहिन के प्रधानमंत्री आवास योजना ह सिरिफ ओमन ला एक घर भर नइ देहे हे, भलुक उनकर परिवार के सुघर भबिस बर एक मजबूत नेव घलो रखे हे।