प्रधानमंत्री आवास योजना: सुफल होइस रामकुमार के पक्‍का घर के सपना

मुंगेली, हर मनखे के मन म एक पक्का मकान के सपना रहिथे, जेमा ओहा सुकुन के जिनगी जी सकय। ग्रामीण परिवार मन ल सम्मानजनक जीवन देहे के रद्दा म भारत सरकार के बड़े योजना प्रधानमंत्री आवास योजना (ग्रामीण) एक ऐतिहासिक पहल आय। ए योजना के उदेस ‘आवास प्लस’ सर्वे म चुने गे जम्मो बेघर परिवार अउ कच्चा अउ जर्जर मकान म रहइया पात्र हितग्राही मन ल सुरक्षित अउ पक्का घर देवाना हे। ए कड़ी म मुंगेली जिला के ग्राम नारायणपुर के रहइया श्री रामकुमार के पक्‍का घर के सपना साकार होइस हे।
रामकुमार ह बताइस के पहिली ओहा अपन परिवार के संग एक टूटे-फूटे कच्चा मकान म जिनगी बितावत रहिस। सावन-भादो म छत टपकय, भिथिया मन म दरार रहिस अउ हर मौसम ह ओकर परिवार बर एक चुनौती बन जावत रहिस। आर्थिक स्थिति कमजोर होय के सेती ओहा पक्का मकान बनाए म असमर्थ रहिस। ओकर करा अतेक पइसा नइ रहिस के ओहा अपन पक्का घर बना सकय। कई बछर तक कच्चा मकान म ही गुजारा करे बर परिस, फेर “मोर घर, मोर अधिकार” के संकल्प के संग प्रधानमंत्री आवास योजना (ग्रामीण) के तहत मंजूरी मिले के बाद सासन ले मिले आर्थिक मदद अउ पंचायत के सलाह ले ओहा अपन सपना के पक्का घर बनाइस। प्रधानमंत्री आवास योजना ह सिरिफ ओला एक ठन घर नइ दिस, बल्कि आत्मनिर्भरता, मजबूती अउ सम्मान के संग जिनगी जिए के मौका घलो देहे हे। सासन ले मिले ए सहयोग बर रामकुमार ह प्रधानमंत्री अउ छत्तीसगढ़ के मुख्यमंत्री के आभार जताए हे।