पीएम आवास योजना ले साकार होइस सुरक्षित अउ सम्मानजनक जीवन के सपना

कबीरधाम, प्रधानमंत्री आवास योजना के सुग्घर संचालन ले कबीरधाम जिला के जनपद पंचायत पंडरिया के ग्राम पंचायत डबरी के रहइया श्रीमती श्याम बाई के जीवन म नवा अंजोर आए हे। किसान परिवार ले जुड़े श्रीमती श्याम बाई अउ ओकर घरवाला श्री परसन ह पहिली जर्जर कच्चा मकान म रहत रहिन। अऊ सावन-भादो म टपकत छत अउ टूटे-फूटे भिथिया मन के सेती परिवार ह हमेसा डरे-सहमे रहत रहिस।
ए योजना म मंजूरी मिले के बाद घर बनाए बर 1.20 लाख रुपया के राशि ल तीन किश्त म डीबीटी (DBT) के माध्यम ले ओकर बैंक खाता म जमा करे गीस। पंचायत अउ मैदानी कर्मचारी मन के मदद ले तय समय म पक्का घर बनके तैयार होगे। परिवार ल सरकार के दूसर योजना मन के घलो संग म लाभ मिलिस। मनरेगा (MGNREGA) के तहत 90 दिन के काम के बदला लगभग 22 हजार रुपया मजदूरी, स्वच्छ भारत मिशन ले शौचालय, प्रधानमंत्री उज्ज्वला योजना ले गैस कनेक्शन, नल-जल अउ बिजली के सुबिधा, आयुष्मान भारत योजना ले इलाज बर सुरक्षा अउ पेंशन संग दूसर योजना मन ले नियमित आर्थिक मदद मिलत हे।
कलेक्टर कबीरधाम श्री गोपाल वर्मा ह बताइन के जिला म घर बनाए के काम के बराबर जाँच-परख होवत हे। जिला म 50,869 आवास मंजूर करे गए हे, जेमा ले 27,966 घर ह बनके पूरा हो गे हे।