अम्बिकापुर, केन्द्र अउ राज्य सरकार के जन-कल्याणकारी योजना मन समाज के आखिरी मनखे तक पहुंचके उनकर जीवन म सुघर बदलाव लावत हें। सरगुजा जिला के अम्बिकापुर विकासखंड के भीतरी के ग्राम पंचायत आमादरहा के रहइया मोटू राम पहाड़ी कोरवा एकर जीता-जागता उदाहरन हें। प्रधानमंत्री जनमन आवास योजना के परताप ले उनकर कइ बछर के जुन्ना पक्का घर के सपना अब पूरा होवत हे।
मोटू राम ह अपन परिवार के संग अब्बड़ दिन ले कच्चा मकान म रहत रहिस। खेती-किसानी अउ छोटकन किराना दुकान ले परिवार के पेट भरइया मोटू राम बर कम कमाई म पक्का घर बनाना संभव नइ रहिस। बरसात के दिन म वोकर घर के छानी हसूहय, जेकर से पूरा परिवार ला भारी दुख-तकलीफ के सामना करे बर परत रहिस। हर बछर मकान के मरम्मत अउ लिपाई-पुताई म अलग से बखत अउ पैसा खरच होवत रहिस।
प्रधानमंत्री जनमन आवास योजना ह उनकर जीवन म नवा आस जगाइस। योजना के तहत ओमन ला पक्का मकान मिले बर मंजूरी मिलिस, जेकर निरमाण के काम लगभग पूरा हो चुके हे। अब लउहे वोकर परिवार ह नवा अउ सुरक्षित घर म रहे लगही। मोटू राम ह बताथे के निरमाण के सिरिफ थोरिक काम बाचे हे, जेला जल्दी पूरा कर ले जाही।
नवा आवास ला लेके मोटू राम अउ उनकर परिवार अब्बड़ उसाह म हें। उनकर कहना हे के अब ओमन ला बरसात के दिन म घर टपके के चिता नइ रहय अउ परिवार ह सुरक्षित अउ सनमान वाले माहौल म अपन जीवन काट सकही।
मोटू राम के कहानी ए बात के परमान आय के प्रधानमंत्री श्री नरेंद्र मोदी के मारगदरसन अउ मुख्यमंत्री श्री विष्णु देव साय के अगुवाई म चलत योजना मन जरूरतमंद अउ बिसेस रूप ले जनजातीय परिवार मन के जीवन म असली बदलाव लावत हे। प्रधानमंत्री जनमन आवास योजना ह सिरिफ मनखे मन ला पक्का मकानेच नइ देवत हे, भलुक ओमन ला सुरक्षित जीवन, सनमान अउ सुघर भबिस के नवा रद्दा घलो देखावत हे।
पीएम जनमन आवास योजना ले बदलिस मोटू राम के जिनगी
