पक्का मकान मिलिस त बदल गे रतिराम के तकदीर: अब न पानी के डर, न जाड़ के चिंता, पीएम जनमन योजना ले संवर गे जिनगी!

रायगढ़, सरकारी योजना मन कइसे गरीब आदमी के जिनगी बदल देथे, एकर जीता-जागता सबूत रायगढ़ जिला के लैलूंगा ब्लॉक म देखे बर मिले हे। ग्राम कुर्रा के रहइया रतिराम बिरहोर के कइ बरिस जुन्‍ना ‘पक्का घर’ के सपना अब ‘पीएम जनमन योजना’ के सेती पूरा हो गे हे।
रतिराम अउ ओकर परिवार पहिली कच्चा मकान म रहत रिहिस। बरसात के पानी, कड़कड़ाती ठंड अउ जहरीला कीरा-मकउड़ा के डर हर घरी बने रहय। जिनगी काटना भारी मुस्किल रिहिस। फेर जब ले रतिराम ला पीएम जनमन योजना के तहत पक्का आवास मिलिस, उंकर तो जइसे दिने बदल गे।
घर बनतेच रतिराम अपन परिवार संग गृहप्रवेश करिस। वो ह बताथे के “पहिली टूटू-फूटू कुंदरा म रहना मजबूरी रिहिस, फेर अब पक्का मकान म रहिना गरब के बात हे।”
हम आप मन ला बता दन के भारत सरकार डहर ले साल 2023 म शुरू करे गे ‘पीएम-जनमन योजना’ आदिवासी समाज के विकास बर वरदान साबित होवत हे. ये योजना पिछड़ी जनजाति के लोगन तक घर, बिजली, पानी अउ रोजगार पहुंचावत हे, जेकर से रतिराम जइसे कतको हितग्राही मन अब सम्मान के जिनगी जी पावत हें।