एतवा राम के कइ बछर जुन्ना पक्का मकान के सपना होइस साकार
बलरामपुर, प्रधानमंत्री जनमन योजना के माध्यम से विशेष पिछड़ी जनजाति समाज मन ला अलग-अलग किसम के सरकारी योजना मन के लाभ देहे जात हे। पीएम जनमन आवास योजना हा विशेष पिछड़ी जनजाति समाज के जिनगी म न केवल सुधार लावत हे, बल्कि पक्का मकान के सपना ला घलो पूरा करत हे।
बलरामपुर जिला के विकासखंड राजपुर के ग्राम पंचायत चांची के रहइया श्री एतवा राम हा बताइस के ओ अपन परिवार के संग कइ बछर से कच्चा झोपड़ी म रहत रहिस। ओकर परिवार हा कमाय-खाय के बूता करके जिनगी काटत रहिस। आर्थिक हालत ठीक नइ होय के सेती पक्का मकान बनाना ओकर बर एक बड़का चुनौती रहिस। बरसात म टपकत छत, जाड़ के ठिठुरन अउ घाम के तपन ओकर परिवार बर हमेशा के मजबूरी बने रहिस। पइसा के तंगी के सेती ओकर पक्का घर के सपना पूरा नइ हो पावत रहिस। ओला प्रधानमंत्री जनमन आवास योजना के अंतर्गत आवास के मंजूरी मिलीस। समय म पइसा अउ सामान मिले ले ओकर मकान बनके तियार हो गे अउ आज ओ अपन परिवार के संग सुरक्षित पक्का घर म रहत हे। श्री एतवा राम कहिथे के नवा घर हा मोला जिनगी के सबले बड़का खुसी देहे हावे। अब मोर परिवार हा मौसम के मार से सुरक्षित हे।
ए बात हा धियान देहे के हे के प्रधानमंत्री जनमन आवास योजना के उद्देस विशेष पिछड़ी जनजातीय परिवार मन ला पक्का अउ सुरक्षित घर देवाना आय। ए योजना के माध्यम से पात्र परिवार मन ला आर्थिक मदद देहे जाथे, ताकि ओमन अपन खुद के घर बना सकंय अउ मान-सम्मान के संग जिनगी जी सकंय।
