कांकेर, 10 सितंबर 2024। केंद्र शासन कोति ले विशेष पिछड़ी जनजाति मन के कल्याण बर शुरू करे गए महत्वाकांक्षी योजना प्रधानमंत्री जनजाति आदिवासी न्याय महाअभियान (पीएम जनमन) के लाभ प्रदेश के पीव्हीटीजी बसाहट वाले सुदूर अंचल तक पहुंचत हे। जिला के नरहरपुर विकासखंड म निवासरत विशेष पिछड़ी जनजाति (कमार) समूह के मनखे मन ल घलोक शासन के कई ठन योजना मन के लाभ मिलत हे, जेखर से उंखर जीवन स्तर म काफी सुधार होवत हे। कांकेर जिला के नरहरपुर विकासखण्ड के ग्राम-बादल निवासी श्रीमती रेवती बाई अइसन हितग्राही हे, जेकर प्रधानमंत्री आवास (ग्रामीण) ले ओखर पक्का मकान के सपना साकार होए हे।
कांकेर जिला के नरहरपुर विकासखण्ड ले लगभग 8 कि.मी. दुरिहा बसे गांव बादल के रहइया श्रीमती रेवती बाई ह बताइस के पहिली ओ ह अपन परिवार के संग कच्चा अउ जुन्ना मकान म रहत रहिस, जेमां बरसात के दिन म जीवन-यापन करे म अड़बड़ परेसानी होवय। खपरा के छांधी होए के सेती चूहय, भइंया ओद्दा रहय ते पाए के जहरीला जीव-जंतु के खतरा बाढ़ जाए। योजना के तहत् अब पक्का मकान बने के बाद ए सबो परेशानी ले मुक्ति मिल गए हे। वो ह बताइस के प्रधानमंत्री आवास (ग्रामीण) योजना के तहत् ग्राम पंचायत स्तर म ग्रामसभा के माध्यम ले वोकर घर बनवाए बर साल 2023-24 म वोकर नाव पास होइस। एखर बाद ओ ल 02 लाख रूपिया चार किश्त म सीधा वोखर बैंक खाता म मिलीस अउ मनरेगा के माध्यम ले 95 दिन के मजदूरी के राशि घलोक मिलिस।
श्रीमती रेवती ह बताइस के कच्चा जर्जर मकान म अपन परिवार के संग बड़ मुश्किल ले गुजारा होवत रहिस, अब प्रधानमंत्री आवास (ग्रामीण) जनमन योजना ले घर म एक कमरा के संग एक रंधनी कुरिया, परसार अउ शौचालय बने हे। वो ह कहिस के अब ओ ह पहिली ले बेहतर जीवन यापन करत हे। श्रीमती रेवती बाई ह पक्का घर के सपना पूरा होए म प्रसन्नता व्यक्त करत प्रधानमंत्री श्री नरेन्द्र मोदी अऊ मुख्यमंत्री श्री विष्णुदेव साय के प्रति आभार प्रकट करे हे।
