अब गांव तक पहुंचना होइस आसान, पक्की सड़क ले मिलीस विकास ल गति
महासमुन्द: जिला के ग्राम बांसकुड़ा कमार बस्ती म अड़बड़ दिन ले सड़क जइसे बुनियादी सुविधा के कमी रहिस। ये इलाका म कमार जनजाति के मनखे मन रहिथें, जिंकर आर्थिक अउ सामाजिक स्थिति सड़क नइ होय के सेती पिछड़ गे रहिस। खास करके बरसात म कच्ची सड़क ह खराब हो जाय, जेकर ले अस्पताल, स्कूल अउ बाजार जाय म भारी दिक्कत होवत रहिस।
79 लाख के लागत ले बनिस पक्की सड़क
ये समस्या ला दूर करे बर बछर 2023-24 म प्रधानमंत्री जनजाति आदिवासी न्याय महाअभियान (पीएम जनमन) के तहत बांसकुड़ा म सड़क निर्माण के चुनाव करे गीस। 79.23 लाख रूपिया के लागत ले 1.60 किलोमीटर लंबा पक्की सड़क बनाय के मंजूरी मिलीस अउ अब ये काम पूरा हो गे हे।
जिनगी म आइस बड़का बदलाव
सड़क बने ले अब गांव म एम्बुलेंस अउ स्वास्थ्य सेवा मन आसानी ले पहुँचत हें। गर्भवती महतारी मन अउ सियान मन ला समय म इलाज मिलत हे। लइका मन के स्कूल अउ कॉलेज जाय के रद्दा घलो आसान हो गे हे। किसान मन ला अपन फसल अउ कमार भाई मन ला अपन बांस ले बने सामान (बांस शिल्प) ला बाजार तक ले जाय म अब कोनो तकलीफ नइ होवज हे।
गांव के एक कमार परिवार ह कहिस के, “पहिली सड़क नइ रहय त बहुत दुख पावत रहेन, फेर अब मोदी जी अउ साय जी के ये योजना ले हमर जिनगी सुधर गे हे।”