प्रधानमंत्री किसान सम्मान निधि ले दशरथ राठौर के खेती ला मिलिस संबल, खाद-बीज के चिंता होगे दूर

CHHATTISGARHI NEWS: पेंड्रा-मरवाही, छत्तीसगढ़ सरकार अऊ केंद्र सरकार के संघरा उदीम ले ग्रामीण क्षेत्र के किसान मन के जिनगी म एक सुग्घर बदलाव आवत हे। जिला के गौरेला विकासखंड के ग्राम पंचायत आन्दुल निवासी किसान श्री दशरथ राठौर के परिवार बर ‘प्रधानमंत्री किसान सम्मान निधि’ योजना ह खेती-किसानी के काम म बहुत बड़ संबल बने हे। पहिली दशरथ राठौर ला खेती बर खाद, बीज अऊ दीगर जरूरी सामान बिसाए बर महाजन या दूसर ले करजा लेहे बर परत रहिस, जेकर सेती फसल कटाई के बेरा भारी आर्थिक दबाव झेले बर बाध्य होना परत रहिस। कम आमदनी अऊ पूंजी के कमी के सेती खेती के काम ठीक ढंग से नई चल पात रहिस अऊ परिवार के गुजर-बसर म घलो दिक्कत आत रहिस।
फेर जब ले शासन के प्रधानमंत्री किसान सम्मान निधि के नियमित किस्त दशरथ राठौर के बैंक खाता म आए ल सुरू होगे हे, ओकर खेती के पूरा गणित बदल गे हे। अब ओला समय म खाद अऊ उत्तम किस्म के बीज बिसाए बर ककरो आगू हाथ पसारे के जरूरत नई परत हे। ए योजना के राशि मिले के सेती दशरथ राठौर बेफिक्र होके अपन खेत म फसल के बोआई कर पावत हे। समय म खाद-बीज मिल जाए के सेती खेत के पैदावार म घलो बढ़ोत्तरी होवत हे, जेकर से ओकर आमदनी बढ़त हे अऊ परिवार के आर्थिक स्थिति सुधरत हे।
ए प्रकार के जनहितैषी योजना मन के जरिए किसान मन आत्मनिरभर बनत हें अऊ खेती के काम म ओमन ला नवा उत्साह मिलत हे। प्रधानमंत्री किसान सम्मान निधि योजना ह जमीनी स्तर पर किसान मन के आर्थिक बोझ ला कम करके ओकर जिनगी ला आसान बनावत हे। दशरथ राठौर जइसे हजारों किसान मन के सफलता के कहानी ए बात के प्रमाण हे के सही समय म मिले सरकारी मदद के सेती ग्रामीण अर्थव्यवस्था मजबूत होवत हे अऊ किसान मन के सपना साकार होवत हे।