प्रधानमंत्री किसान सम्मान निधि ले रामधनी के खेती ला मिलिस बढ़ावा, खाद-बीज के चिंता होगे दूर

CHHATTISGARHI NEWS: सूरजपुर, छत्तीसगढ़ सरकार अऊ केंद्र सरकार के संघरा उदीम मन ले ग्रामीण क्षेत्र के किसान मन के जिनगी म एक सुग्घर बदलाव आवत हे। सूरजपुर जिला के ग्राम पंचायत करंजी के किसान रामधनी के परिवार बर ‘प्रधानमंत्री किसान सम्मान निधि’ योजना ह खेती-किसानी के काम म बहुत बड़ सहारा बने हे। पहिली रामधनी ला खेती बर खाद, बीज अऊ दीगर जरूरी सामान खरीदे बर महाजन या दूसर ले करजा लेहे बर परत रहिस, जेकर सेती फसल कटाई के बेरा भारी आर्थिक दबाव झेले बर बाध्य होना परत रहिस। कम आमदनी अऊ पूंजी के कमी के सेती खेती के काम ठीक ढंग से नई चल पावत रहिस अऊ परिवार के गुजर-बसर म घलो दिक्कत जात रहिस।
फेर जब ले शासन के प्रधानमंत्री किसान सम्मान निधि के नियमित किस्त रामधनी के बैंक खाता म आए सुरू होगे हे, ओकर खेती के पूरा गणित बदल गे हे। अब ओला समय म खाद अऊ उत्तम किस्म के बीज खरीदे बर ककरो आगू हाथ फैलाए के जरूरत नई परत हे। ए योजना के राशि मिल जाए के सेती रामधनी बेफिक्र होके अपन खेत म धान अऊ दूसर फसल के बोआई कर पात हें। समय म खाद-बीज मिल जाए के सेती खेत के पैदावार म घलो बढ़ोत्तरी होवत हे, जेकर से ओकर आमदनी बाढ़त हे अऊ परिवार के आर्थिक स्थिति सुधरत हे।
ए प्रकार के जनहितैषी योजना मन के जरिए किसान मन आत्मनिरभर बनत हें अऊ खेती के काम म ओमन ला नवा उछाह मिलत हे। प्रधानमंत्री किसान सम्मान निधि योजना ह जमीनी स्तर पर किसान मन के आर्थिक बोझ ला कम करके ओकर जिनगी ला आसान बनावत हे। रामधनी जइसन हजारों किसान मन के सफलता के कहानी ए बात के प्रमाण हे के सही समय म मिले सरकारी मदद के सेती ग्रामीण अर्थव्यवस्था मजबूत होवत हे अऊ किसान मन के सपना साकार होवत हे।