पीएम मातृत्व वंदना योजना- गर्भवती महिला मन के जीवन ल मिलत हे संबल
गौरेला-पेंड्रा- मरवाही, प्रधानमंत्री मातृ वंदना योजना गर्भवती अऊ स्तनपान करइया महिला मन खातिर एक वित्तीय सहायता उपलब्ध करात हे। ए योजना के उद्देश्य माता मन ल भरपूर पोषण अऊ आराम ठउका करे खातिर आर्थिक सहायता करना अऊ मजदूरी के नुकसान के भरपाई करना हे, ताकि कुपोषण के प्रभाव ल कम करे जा सकय। प्रधानमंत्री मातृत्व वंदना योजना प्रदेश के गर्भवती महिला मन खातिर जीवन संबल साबित होवत हे। योजना ले महिला मन ल आर्थिक सहयोग मिलत हे संगेच समय म स्वास्थ्य जांच, टीकाकरण अऊ पोषण आहार घलोक उपलब्ध होवत हे। ए योजना के तहत पहिली लइका के जन्म म 5,000 रूपिया अऊ दूसर लइका के जन्म म (कहूं वो लड़की हे) 6,000 रूपिया देहे जाथे।
गौरेला-पेंड्रा- मरवाही जिला के ग्राम पंचायत तेन्दुमूड़ा के श्रीमती कमला एकर सशक्त उदाहरण हे। गर्भावस्था के समय आंगनबाड़ी कार्यकर्ता के मदद ले योजना के पंजीयन कराए के बाद ओ ल सरलग स्वास्थ्य सेवा मिलीस। योजना के पहली किस्त म मिले तीन हजार रुपिया ले वो ह पौष्टिक आहार अऊ दवइ बिसाईय। उहें प्रसव बाद संस्थागत प्रसव अऊ शिशु टीकाकरण के बाद दुसरा किस्त के रूप म दू हजार रुपिया अऊ मिलिस। ए प्रकार ले कुल 5 हजार रुपिया के आर्थिक सहायता ले कमला अऊ वोखर नान्हे लइका के बेहतर देखभाल संभव होइस।
श्रीमती कमला ह प्रसन्नता व्यक्त करत कहिस के ओ ल योजना ले आर्थिक मदद तो मिलबे करिस संगेच सही समय म स्वास्थ्य जांच अऊ पोषण आहार घलोक उपलब्ध होइस। मोर कामना हे के ए योजना के लाभ हर जरूरतमंद महिला तक पहुँचय।
जानबा हे के साल 2017 ले लागू प्रधानमंत्री मातृत्व वंदना योजना अब तक लाखों महिला मन तक पहुँच गे हे। ये योजना मातृ अऊ शिशु मृत्यु दर कम करे के संग महिला मन अऊ लइका मन के स्वास्थ्य अऊ पोषण ल सुधारे म उल्लेखनीय योगदान देवत हे।
पीएम मातृत्व वंदना योजना: आर्थिक मदद अऊ स्वास्थ्य सेवा ले निखरत हे मातृत्व के सफर
