पीएम सुरुज घर योजना ले रवींद्र सिंह ल मिलीस राहत

घर म खुद के बिजली ले आत्मनिर्भरता अऊ पर्यावरण सुरक्षा म योगदान
सूरजपुर, केन्द्र सरकार के पीएम सुरुज घर मुफ्त बिजली योजना ह आम मनखे मन के जीवन म बड़का बदलाव लाए हे। ये योजना बिजली के संग आर्थिक बचत अऊ पर्यावरण सुरक्षा दुनों बर लाभदायक हे। हर घर ल ऊर्जा के केंद्र बनाए के दिशा म ये एक बड़का कदम हे। सूरजपुर जिला निवासी रवींद्र सिंह ह ए योजना के तहत अपन घर के छत म 3 किलोवाट के सोलर रूफटॉप सिसटम लगवाए हे। सिंह ह ए योजना के लाभ लेहे बर राष्ट्रीय पोर्टल म ऑनलाइन आवेदन करिस, जेखर बाद डिस्कॉम ले पंजीकृत वेंडर कोति ले वोखर घर म सोलर यूनिट लगाईस।
वो ह बताइस के वोखर घर म पहिली रोजेच 12 ले 13 यूनिट बिजली के खपत होत रहिस, फेर अब वोखर घर म स्थापित सोलर सिसटम ले रोजाना 17 ले 19 यूनिट बिजली के उत्पादन होवत हे। ते पाए के अब ओखर बिजली बिल शून्य न ही भलुक माइनस म आवत हे अऊ हर महीना ऊर्जा क्रेडिट घलोक मिलत हे, जेन भविष्य के बिल म एडजस्ट होथे।
रवींद्र सिंह ह बताइस के पीएम सुरुज घर योजना ह हमला न सिरिफ बिजली बिल ले मुक्ति देवाए हे, बल्कि पर्यावरण के रक्षा म घलोक हमर योगदान बढ़ाए हे। मैं सबो मनखे मन ले अपील करत हंव के ए योजना के लाभ लेवव अऊ आत्मनिर्भर बनव।