10 किलोवाट सोलर रूफटॉप संयंत्र ले हर महीना होवत हे भारी बचत; स्वच्छ ऊर्जा ला अपनाए बर नागरिक मन ले योजना के लाभ उठाए के करिन गोहार
कोरबा, प्रधानमंत्री श्री नरेंद्र मोदी के दूरदर्शी नेतृत्व म ऊर्जा आत्मनिर्भर भारत के संकल्प ला पूरा करे के उद्देश्य ले शुरू करे गए प्रधानमंत्री सूर्यघर मुफ्त बिजली योजना आज लाखों परिवार मन के जिंदगी म सकारात्मक बदलाव के जरिया बनत हे। मुख्यमंत्री श्री विष्णुदेव साय के मार्गदर्शन म छत्तीसगढ़ म ए महत्वाकांक्षी योजना के असरदार अउ जनहितकारी क्रियान्वयन पक्का करे जात हे। योजना के तहत घर के छत ऊपर सोलर रूफटॉप संयंत्र स्थापित करके आम नागरिक न सिरिफ अपन बिजली खरचा म भारी बचत करत हवंय, बल्कि स्वच्छ अउ हरियर ऊर्जा ला अपनाके पर्यावरण संरक्षण, ऊर्जा आत्मनिर्भरता अउ सतत विकास के दिशा म घलो महत्वपूर्ण योगदान देवत हवंय।
कोरबा शहर के उदयनगर, पोड़ीबहार के रहइया सेवानिवृत्त बालको कर्मचारी श्रीमती फ्लोरेंस तिर्की ह रिटायर्ड के बाद अपन नवा घर बनवाइन। इही बीच ओमन ला प्रधानमंत्री सूर्यघर मुफ्त बिजली योजना के जानकारी मिलिस। योजना के तहत मिलइला लाभ अउ बिजली बिल म बचत के संभावना ला देखत ओमन ह बिना कोनो देरी करे पाछू बछर अपन घर के छत म 10 किलोवाट क्षमता के सोलर रूफटॉप संयंत्र लगवाइन।
श्रीमती तिर्की ह बताइन के ओकर घर म बिजली के खपत अउ मन ले जादा रहिस। संग म ओमन अपन बाड़ी के सिंचाई बर मोटर के घलो नियमित उपयोग करथें। इही जरूरत मन ला ध्यान म रखत ओमन ह 10 किलोवाट क्षमता के सोलर संयंत्र लगवाइन। संयंत्र लगे के बाद ले उंकर बिजली बिल शून्य होगे हे, जेकर से उमन ला हर महीना भारी आर्थिक राहत मिलत हे। ओमन बताइन के पहिली जादा खपत के कारन बिजली बिल भारी आवत रहिस, फेर अब न सिरिफ बिजली के खरचा खतम होगे हे, बल्कि जादा बिजली उत्पादन ले आगू म अऊ उपराहा कमइ के घलो सम्भावना बने हे।
ओमन ह कहिन के पीएम सूर्यघर योजना आम नागरिक मन बर भारी फाइदा के पहल हे। ए योजना बिजली बिल ले राहत देहे के संगे-संग स्वच्छ ऊर्जा ला बढ़ावा देहे बर अउ आर्थिक बचत पक्का करे के असरदार जरिया बनत हे। ओमन ह जादा ले जादा नागरिक मन ले ए योजना के लाभ उठाए के गोहार लगाइन।
योजना ले मिले ए सुविधा अउ आर्थिक राहत बर ओमन ह प्रधानमंत्री श्री नरेंद्र मोदी अउ मुख्यमंत्री श्री विष्णुदेव साय के प्रति आभार प्रगट करिन।
