बिजली बिल के टेंशन खतम: बलौदाबाजार म 700 ले ज्यादा घर बन गे ‘पॉवर हाउस’, सरकार देत हे मुफ्त बिजली अउ पइसा!

बलौदाबाजार, महंगई के जमाना म कहूं बिजली बिल जीरो (0) हो जाए, त कतेक खुसी मिलही? बलौदाबाजार-भाटापारा जिला म ‘पीएम सूर्यघर मुफ्त बिजली योजना’ ह लोगन के ये सपना ला सच कर देखाए हे। पीएम मोदी अउ सीएम विष्णुदेव साय के ए योजना ला अपनाय बर लोगन म भारी उत्साह देखे बर मिलत हे।
जिला म अब तक 7,869 परिवार मन ए योजना बर रजिस्ट्रेशन करवा डारे हें। खुसी के बात ये हे के 728 घर के छत म सोलर पैनल लग घलो गे हे अउ उंकर घर अब मुफ्त के बिजली ले जगमगावत हे। सबले बड़का बात ये हे कि सरकार ह 501 लोगन के खाता म सब्सिडी के पैसा घलो भेज दे हे, यानी दुगना फायदा।
कलेक्टर दीपक सोनी के देखरेख म ये योजना जिला म तेजी ले चलत हे। अब लोगन ला बिल पटाए के चिंता नइ हे, उंकर खुद के छत ही अब बिजली बनावत हे। कहूं आप मन घलो ए योजना के लाभ नइ लेहे हव, त जल्दी रजिस्ट्रेशन कराव अउ फायदा उठावव।