कोरबा, छत्तीसगढ़ सरकार के प्रधानमंत्री विश्वकर्मा योजना ह कोरबा जिला के अशोक कुमार अगरिया के जिनगी मं नवा डगर अउ नवा आत्मविश्वास भर देहे हे। कई बछर ले राजमिस्त्री के काम करत आत अशोक कुमार ह अपन पुरखौती गुन ला आधुनिक तकनीक के संग जोड़के आगू बढ़ना चाहत रहिस, फेर बढ़िया ट्रेनिंग अउ साधन के कमी ओकर रद्दा मं बड़का अड़चन रहिस।
लाइवलीहुड कॉलेज मं मिलिस नवा सीख
लाइवलीहुड कॉलेज कोरबा मं ‘ब्रिक मेशन बेसिक ट्रेड’ के ट्रेनिंग ओकर बर बदलाव के बड़का मउका बनके आईस। उहाँ ओ ह नवा जमाना के इलेक्ट्रॉनिक औजार मन के उपयोग, घर बनाय के आधुनिक तरीका, काम मं तेजी लाय अउ मजबूती ठउका करे के नवा गुन सीखीस। ए तकनीक मन ले ओकर काम ह नइ सिरिफ मजबूत अउ सटीक होइस, बल्कि आज के होड़ (प्रतिस्पर्धा) मं ओला नवा पहिचान घलो मिलिस।
स्टाइपेंड अउ लोन ले मिलिस आर्थिक सहारा
ट्रेनिंग के बखत सरकार कोति ले एक हफ्ता के ट्रेनिंग बर चार हजार रूपया के स्टाइपेंड मिलिस, जेकर ले ओला आर्थिक मदद मिलिस। उहें, बिना कोनो गारंटर के एक लाख रूपया तक के लोन ओकर बर कोनो वरदान ले कम नइ रहिस। ए मदद ले ओ ह अपन व्यापार बर जरूरी आधुनिक मशीन बिसाईस अउ अपन काम के दायरा ला बढ़ाईस।
युवा मन बर बनीस प्रेरणा
आज अशोक कुमार अगरिया ह अपन हुनर, आधुनिक गियान अउ सरकारी सहयोग के दम मं आत्मनिर्भरता डहर मजबूती ले कदम बढ़ावत हें। ओकर लगन अउ मिहनत ह ओकर पुरखौती रोजगार ला नवा रूप दे हे। ओ ह नइ सिरिफ अपन परिवार ला बढ़िया ले सम्हालत हें, बल्कि जिला के युवा कारीगर मन बर प्रेरणा के स्रोत घलो बन गे हें।