हेमचंद के परिवार ल मिलिस प्रधानमंत्री आवास योजना के तहत पक्का घर शासन के योजना बनिस सहारा

कोंडागांव, मुख्यमंत्री श्री विष्णु देव साय के हर परिवार ल सुरक्षित अउ सम्मानजनक घर देहे के सोच के मुताबिक प्रधानमंत्री आवास योजना ह जमीनी स्तर म लोगन के जिनगी बदलत हे। एकर जीयत-जागत उदाहरण हवय नगर पंचायत फरसगांव, जिला कोंडागांव के वार्ड क्रमांक 4 के रहवईया श्री हेमचंद नाग, जे ह ए योजना के माध्यम ले अपन ददा श्री तिरकू राम नाग ल पक्का मकान उपहार म दीस।
हेमचंद नाग ह बताइस के ओखर पुराना घर बांस अउ माटी के बने रिहिस, जे बरसात के दिन म घेरी-बेरी टूट-फूट जावत रिहिस। कमजोर भिथिया के सेती परिवार के सबो सदस्य – ददा, घरवाली अउ दू लइका मन ल भारी दिक्कत के सामना करे बर परत रिहिस। हालत अइसन हो गे रिहिस के सुरक्षा ल देखत ओला अपन ददा ल कुछ दिन बर भाई के घर भेजे बर परिस।
मुख्यमंत्री श्री विष्णु देव साय के अगुवाई म राज्य सरकार कोति ले प्रधानमंत्री आवास योजना के सही ढंग ले क्रियान्वयन अउ पात्र हितग्राही मन तक लाभ पहुंचाय के नीति के तहत, वार्ड स्तर म जानकारी मिले के बाद हेमचंद नाग ल योजना ले जोड़े गीस। नगर पंचायत अउ अधिकारी मन के सक्रियता ले आवास मंजूर होईस अउ 29 वर्गमीटर म 3.05 लाख रुपया के लागत ले पक्का मकान बनके तैयार होईस।
गृह प्रवेश के सुभ मौका म हेमचंद नाग ह सबले पहिली अपन ददा के हाथ ले विधि-विधान ले पूजा करवाईस अउ भावना के संग ए पक्का मकान ओमन ल समर्पित करिस। नवा घर ल देख के ददा भावुक हो गे। हेमचंद नाग ह कहिस के मुख्यमंत्री श्री विष्णु देव साय के सोच सिरिफ योजना के घोषणा तक सीमित नइये, बल्कि ओखर उद्देश्य आखिरी आदमी तक सम्मान, सुरक्षा अउ आत्मविश्वास पहुंचाना हे। उमन ए उपलब्धि बर पार्षद, मुख्य नगर पालिका अधिकारी अउ नगर पंचायत के सबो कर्मचारी मन के आभार जताइस।