3 लाख रूपया के ऋण अऊ 75 हजार रूपया के सब्सिडी ले सुरू करीस ‘श्योरस कैफे’, बनिस सफल युवा उद्यमी
बीजापुर, प्रधानमंत्री रोजगार सृजन कार्यक्रम केंद्र सरकार के एक ऋण-आधारित सब्सिडी योजना आय, जेला सूक्ष्म, लघु अऊ मध्यम उद्यम मंत्रालय कोती ले चलाए जात हे। एकर मुख्य उद्देश्य नवा सूक्ष्म उद्यम स्थापित करके रोजगार के अवसर पैदा करना हे। सरकारी योजना मन युवा मन ल आत्मनिर्भर बनाए बर अऊ ओकर सपना मन ल पूरा करे म बहुत बड़े भूमिका निभावत हवँय। बीजापुर के युवा उद्यमी आस्था मंडावी ह प्रधानमंत्री रोजगार सृजन कार्यक्रम (पीएमईजीपी) के लाभ उठा के अपन उदिम सुरू करिस अऊ सफलता के नवा मिसाल पेश करिस।
आस्था मंडावी ह प्रधानमंत्री रोजगार सृजन कार्यक्रम के तहत भारतीय स्टेट बैंक, बीजापुर ले 3 लाख रूपया के ऋण प्राप्त करिस। योजना के अंतर्गत ओला परियोजना लागत के 25 प्रतिशत यानी 75 हजार रूपया के मार्जिन मनी सब्सिडी घलोक स्वीकृत होईस। जिला व्यापार अऊ उद्योग केंद्र (डीआईसी), बीजापुर ह आवेदन प्रक्रिया म जरूरी मार्गदर्शन अऊ सहयोग दीस।
आस्था ह करीस बीजापुर म ‘श्योरस कैफे’ के सुरूआत
योजना ले मिले आर्थिक सहायता ले आस्था ह बीजापुर म ‘श्योरस कैफे’ के सुरूआत करिस। ए कैफे सिरिफ खाय-पीए तक सीमित नई हे, भलुक इहाँ डेली नीड्स स्टोर के सुविधा घलोक उपलब्ध हे। ग्राहक मन इहाँ कॉफी, बर्गर, पिज्जा, सैंडविच, फास्ट फूड अऊ कोल्ड ड्रिंक्स के संगे-संग नमकीन, बिस्कुट, चॉकलेट, मिक्सचर अऊ रोज के उपयोग के कतको जरूरी सामान मन ल घलोक बिसा सकत हवँय।
एकेच जगा म कतको सुविधा मन ल देहे के प्रयास
आस्था के उद्देश्य गाहक मन ल ओकर जरूरत के ज़्यादा ले ज़्यादा सामान मन ल एकेच जगा म उपलब्ध कराना हे। बने सेवा, गाहक मन के जरूरत ल समझे अऊ मयारू व्यवहार के सेती ‘श्योरस कैफे’ ह स्थानीय नागरिक मन अऊ युवा मन के बीच म झटकुन लोकप्रिय होत हे। आस्था मंडावी ह कम उमर म उद्यमिता के रद्दा चुन के ए साबित कर देहे हे के सही योजना, आत्मविश्वास अऊ मेहनत ले सफलता पाए जा सकत हे। ओकर ए प्रयास ओला आत्मनिर्भर बनाए के संगे-संग आघू चलके स्थानीय स्तर म रोजगार के नवा अउसर घलोक पैदा करही।
युवा मन के सपना मन ल पूरा करत हे पीएमईजीपी योजना
आस्था मंडावी के सफलता ए बात के मिसाल आय के प्रधानमंत्री रोजगार सृजन कार्यक्रम ह युवा मन ल सिरिफ आर्थिक सहायताच नई देवै, भलुक ओमन ल अपन उदिम स्थापित करे अऊ आत्मनिर्भर बने के अउसर घलोक देथे। आस्था के सफलता ज़िला के नोनी मन अऊ दूसर युवा उद्यमी मन बर प्रेरणा बन गे हे।
ओकर कहानी ए संदेसा देथे के कहूं सरकारी योजना मन के सही तरीका ले लाभ उठाए जाए अऊ मेहनत अउ दृढ़ संकल्प के संग आघू बढ़े जाए, त कोनो युवा अपन सपना मन ल सफलता के नवा उडान दे सकत हे।