प्रधानमंत्री रोजगार सृजन कार्यक्रम ले बदल गे जिनगी सफल होटल व्यवसायी बनिन प्रदीप यादव, आर्थिक स्थिति होइस मजबूत

मुंगेली, जिला के गांव करही के रहवइया श्री प्रदीप यादव आज आत्मनिर्भरता अउ मेहनत के मिसाल बन चुके हें। कभू कलेक्टर कार्यालय के आगू घास-फूस के टपरा म होटल के धंधा करइया प्रदीप यादव के जीवन प्रधानमंत्री रोजगार सृजन कार्यक्रम ले मिले सहायता के बाद पूरा बदल गे हे। पहली वोकर होटल एक अस्थायी टपरा म चलत रहिस, जिहां बरसात के मौसम म छप्पर ले पानी टपकत रहिस। टपरा के भीतर चिखला हो जाए ले न केवल ग्राहक मन ल भारी तकलीफ होवत रहिस, बल्कि कम साधन के कारण धंधा ल बढ़ाना घलो संभव नइ हो पात रहिस। एखर बाद घलो प्रदीप यादव ह हिम्मत नइ हारिस अउ अपन धंधा ल आघू बढ़ाए बर मौका खोजत रहिस।
इही कड़ी म ओ ल जिला व्यापार एवं उद्योग केन्द्र, मुंगेली कोति ले चलत प्रधानमंत्री रोजगार सृजन कार्यक्रम के जानकारी मिलिस। योजना के पूरा जानकारी लेहे म उद्योग विभाग के अधिकारी मन ओ ल रद्दा देखाइन अउ ऋण प्रक्रिया म सहयोग करिन। एकर बाद पंजाब नेशनल बैंक, शाखा मुंगेली ले ओ ल 10 लाख रुपिया के ऋण स्वीकृत होइस। मिले ऋण राशि ले प्रदीप यादव ह एक मकान किराया म लेके आधुनिक साधन ले सजे नवा होटल खोलिस। बइठे के बढ़िया बेवस्था, साफ-सुथरा माहौल अउ अच्छा सेवा के सेती वोकर धंधा तेजी ले आघू बढ़िस अउ ग्राहक मन के भरोसा घलो मजबूत होइस। प्रदीप यादव ह बताइस के आज वोकर होटल सफलता के संग चलत हे। एकर ले होवइया आमदनी ले न केवल वोकर आर्थिक स्थिति मजबूत होए हे, बल्कि वोकर परिवार के जीवन स्तर घलो पहली के मुकाबला म अब्बड़ अच्छा हो गे हे। प्रधानमंत्री रोजगार सृजन कार्यक्रम ह ओ ल आत्मनिर्भर बने के मौका दीस अउ वोकर सपना ल सच करिस।