प्रधानमंत्री कौशल विकास योजना ले संवरिस जिनगी

मुंगेली, युवा मन ल रोजगार अऊ स्वरोजगार ले जोड़के आत्मनिर्भर बनाए के दिसा मं सासन कोति ले सरलग उदीम करे जात हे। इही कड़ी मं मुंगेली विकासखण्ड के ग्राम खैरवार के रहवईया श्री आलोक घृतलहरे के जिनगी ह प्रधानमंत्री कौशल विकास योजना के माध्यम ले संवर गे हे। ओ मन योजना के तहत प्रशिक्षण (ट्रेनिंग) पाके रोजगार हासिल करिन अऊ आत्मनिर्भर बनके अपन जिनगी ल नवा डहर देहे हे।
आलोक घृतलहरे ह बताइस के ओ एक सादा परिवार ले आथे। रोजगार के खोज अऊ भविस्स ल बने बनाए के इच्छा ह ओला कौशल प्रशिक्षण डहर प्रोत्साहित करिस। ओला प्रधानमंत्री कौशल विकास योजना के अंतर्गत ‘सेक्टर हेल्थकेयर’ मं प्रशिक्षण के जानकारी अखबार अऊ पाम्पलेट के माध्यम ले मिलिस, जेकर बाद ओ जिला परियोजना लाईवलीहुड कॉलेज, जमकोर, मुंगेली मं प्रशिक्षण लीस। प्रशिक्षण के बखत ओला तकनीकी गियान के संगे-संग सॉफ्ट स्किल्स अऊ कंप्यूटर चलाए के घलोक व्यवहारिक जानकारी देहे गीस, जेकर से ओखर अपन उपर भरोसा के संगे-संग काम करे के छमता घलोक बाढ़िस। प्रशिक्षण पूरा होए के बाद ओखर योग्यता ल देखत जिला अस्पताल मुंगेली मं ओला कंप्यूटर ऑपरेटर कम टेक्नीशियन के पद मं नियुक्ति मिलिस।
आज श्री आलोक न केवल आत्मनिर्भर हे, बल्कि अपन नियमित आय ले परिवार के भरण-पोषण मं अपन ददा के हाथ घलोक बटावत हें। अपन सफलता के श्रेय देवत आलोक ह कहिस के ये उपलब्धि ह प्रधानमंत्री कौशल विकास योजना, जिला परियोजना लाईवलीहुड कॉलेज जमकोर मुंगेली, मुख्यमंत्री श्री विष्णुदेव साय अऊ जिला प्रसासन मुंगेली के सहयोग अऊ मारगदरसन ले ही संभव हो पाए हे। ओ ह खुसी जतावत सासन-प्रसासन के प्रति आभार प्रकट करे हे।