मोबाइल ले बात करत मनखे मन ले छिंतई करइया 5 आरोपी मन ल पुलिस ह ओल्हिइस

भिलाई, रद्दा म रेंगत अऊ खड़े होके मोबाइल म बात करत मनखे मन ले छिंतई के मामला म पांच आरोपी मन ल गिरफ्तार करे गए हे। आरोपी मन तीर ले कुल 10 नग मोबाइल अऊ घटना बर उपयोग म लाए दू ठन फटफटी जपत करे गए हे। आरोपी मन ह भिलाई नगर, भट्ठी, सुपेला, जामुल, छावनी अऊ खुर्सीपार थाना कोति छिंतई करत रहिन। सबो के खिलाफ लूट के धारा मन के तहत कारवाई करके ओ मन ल जेल भेजे गए हे। भिलाई नगर सीएसपी राकेश जोशी के बताती सात सितंबर के डीएवी स्कूल हुडको तीर एक स्कूटी म सवार तीन टूरा मन ह एक सियनहा मनखे के मोबाइल लूटत रहिन। उहें आरोपी मन के स्कूटी के नंबर मिलीस। जेखर आधार म पुलिस ह सुभाष नगर छावनी निवासी चाहत कुमार चौधरी (19) तक पहुंचिस अऊ ओला पकड़ के ओखर से पूछताछ करे गीस। पूछताछ म ओ ह बताइस के वो अपन संगी सुभाष नगर नंदिनी रोड निवासी करन बघेल (19), नंदिनी रोड देशी शराब दुकान के पीछू रहइया सोनू ठाकुर नंदिनी रोड, सुभाष नगर निवासी संजय सिंह (19) के संग मिलके रद्दा म रेंगईया महिला अऊ पुरुष मन ले मोबाइल लूटत रहिन। लूटे मोबाइल ल बिजली आफिस के पीछू रहइया आकाश दुबे (21) तीर बेच देत रहिन। आकाश दुबे शीतला कांप्लेक्स म मोबाइल के दुकान चलाथे। आरोपी मन के निशानदेही म आरोपी मोबाइल दुकान संचालक तीर ले लूट के 10 मोबाइल अऊ घटना म बउरे गए स्कूटी ल जब्त करे गए हे। जब्त मोबाइल के कीमत एक लाख रूपिया आंके गए हे।