रायपुर, मुख्यमंत्री श्री भूपेश बघेल आज पीटीएस माना कैंप म आयोजित छत्तीसगढ़ पुलिस राज्य स्तरीय खेलकूद प्रतियोगिता के समापन समारोह म सामिल होइन। मुख्यमंत्री श्री बघेल ह समापन समारोह म पुलिस मार्च पास्ट के सलामी लेत पुलिस खेलकूद के चिन्हारी के घलोक विमोचन करिन।
ये बेरा म मुख्यमंत्री ह कहिन कि अइसन आयोजन के सबले बड़का लाभ ये हे कि अइसन आयोजन हमार जवान मन के जोश अऊ ऊर्जा ल रिचार्ज कर देथे अऊ इही दू चीज हे जेन हर जवान के पहिचान हे। श्री बघेल ह कहिन कि पुलिस विभाग के काम आसान नइ हे। कदम कदम म चुनौती होथे। ए चुनौती मन ले निपटे बर तन अऊ मन दुनों म स्फूर्ति के होना बहुत जरूरी होथे। खेलकूद न सिरिफ हमला स्फूर्तिवान बनाथे भलुक काम के तनाव ले मुक्ति घलोक देथे। अपन लक्ष्य ल हासिल करे बर स्वस्थ प्रतिस्पर्धा के भावना जगाथे। अपन कर्तव्य मन के सफलता ले निर्वहन करे के संगे संग हमार पुलिस जवान मन ह कॉमनवेल्थ अऊ एशियन गेम्स जइसे राष्ट्रीय अऊ अंतर्राष्ट्रीय स्तर के खेल मन म कई पुरस्कार जीतके अपन प्रदेश अऊ अपन विभाग के नाम रौशन करे हें।
छत्तीसगढ़ पुलिस राज्य स्तरीय खेलकूद प्रतियोगिता के समापन समारोह के अवसर म संसदीय सचिव श्री विकास उपाध्याय, पुलिस महानिदेशक श्री अशोक जुनेजा समेत राज्य के सबो वरिष्ठ पुलिस अधिकारी उपस्थित रहिन।
खेलकूद न सिरिफ हमला स्फूर्तिवान बनाथे भलुक काम के तनाव ले मुक्ति घलोक देवाथे: मुख्यमंत्री श्री भूपेश बघेल
