रायपुर, 24 जनवरी 2020। पुलिस महानिदेशक श्री डी. एम. अवस्थी ह प्रवीण सोमानी अपहरणकांड सुग्घर ढ़ग ले सुलझाए म रायपुर आईजी श्री आनंद छावड़ा अऊ एसएसपी श्री आरिफ शेख समेत 67 पुलिसकर्मी मन ल इन्द्रधनुष सम्मान ले सम्मानित करिस। ये बेरा म उमन कहिन कि पुलिस ह ये अपहरण कांड ल बहुतेच प्रोफेशनल तरीका ले सुलझाए हे। श्री अवस्थी ह कहिन के मुख्यमंत्री कोति ले ये सफलता बर पुलिस जवान मन ल सम्मानित करे जाना हमार बर बड़ गरब के बात हे। ऊंखर सम्मान करे के मतलब ये हे के अब पुलिस के जिम्मेदारी अऊ बाढ़ गए हे। जऊन प्रकार ले पुलिस के टीम काम करत रहिस ओखर से मोला विश्वास रहिस कि हम केस ल जल्दी सुलझा लेबो। आज देशभर म छत्तीसगढ़ पुलिस के चर्चा होवत हे। आप मन के टीमवर्क ह छत्तीसगढ़ पुलिस के नाम ऊंचा करे हे। आप मन खुदे अपन बर नवा मापदण्ड स्थापित करे हव। ए खातिर आन प्रकरण मन म घलोक अइसनहे काम करव। श्री अवस्थी ह कहिन कि रायपुर एसएसपी श्री आरिफ शेख ह बहुतेच बढि़या तरीका ले नेतृत्व करके केस ल सुलझए हें। एकर नतीजा हे कि प्रदेश के बाहिर ले घलोक छत्तीसगढ़ पुलिस ल बधाई मिलत हे। रायपुर एसएसपी श्री आरिफ शेख ह कहिन कि हौसलाअफजाई ले हमेशा मनोबल बाढ़थे। इंद्रधनुष सम्मान ले पुलिसकर्मी मन के उत्साह बाढ़े हे। ये बेरा म ईओडब्ल्यू एसपी श्री सदानंद कुमार, एआईजी श्री राजेश अग्रवाल समेत आन पुलिस अधिकारी अऊ कर्मचारी उपस्थित रहिन।
