- मुख्यमंत्री ह आई.पी.एस. कॉनक्लेव ल संबोधित करिन
- कानून व्यवस्था, मनखे मन के सुरक्षा, दूरस्थ अंचल के विकास बर
- पुलिस जल्दी अऊ प्रभावी ढंग ले काम करयं
- अच्छा कानून व्यवस्था, आयोजन मन म चुस्त-दुरुस्त व्यवस्था, नक्सली घटना म कमी जइसे उपलब्धि मन ल सहराइन
रायपुर, मुख्यमंत्री श्री भूपेश बघेल ह कहिन हे कि मनखे मन के पुलिस उपर विश्वास पुलिस के सबले बड़े पूंजी हे। एला हर हाल म बनाए रखे के उदीम करे जाना चाही। उमन जनता के विश्वास, विकास अऊ सुरक्षा के संकल्प के संग कानून व्यवस्था बनाए रखे, मनखे मन ल सुरक्षा देहे, विकास काम मन के क्रियान्वयन अऊ मनखे मन ल शासन के जनकल्याणकारी योजना मन के लाभ देवाए बर जल्दी अऊ प्रभावी ढंग ले काम करे के गोहार पुलिस ले करिन। ओ मन आज नवा रायपुर, अटल नगर स्थित पुलिस मुख्यालय म पहली पइत आयोजित आईपीएस कॉनक्लेव ल संबोधित करत रहिन। गृह मंत्री श्री ताम्रध्वज साहू, मुख्य सचिव श्री आर. पी. मंडल, पुलिस महानिदेशक श्री डी.एम. अवस्थी, एडीजी सर्व श्री संजय पिल्ले, आर.के. विज अऊ अशोक जुनेजा ये बेरा म उपस्थित रहिन।
मुख्यमंत्री ह कहिन कि वरिष्ठ पुलिस अधिकारी पुलिस कर्मी मन के व्यवहारिक दिक्कत मन ल ध्यान रखव, उंखर से गोठ बात करव अऊ अइसे वातावरण तियार करव, जेखर से पुलिसकर्मी मन के मनोबल ऊंचा रहय अऊ ओ मन पूरा निष्ठा अऊ ईमानदारी के संग अपन कर्तव्य के निर्वाहन करे म सक्षम हो सकयं। आम जनता पुलिस के उपस्थिति म अपन आप ल सुरक्षित महसूस करथें, ये प्रतिष्ठा पुलिस के हर जवान ल बनाए रखना होही। श्री बघेल ह कहिन कि नक्सल प्रभावित क्षेत्र, दूरस्थ गांव मन म सबले पहिली पुलिस पहुँचथे। उहां गांव म सड़क, बिजली, पानी के छोटे-छोटे समस्या रहिथे, पुलिस के अधिकारी अऊ कर्मचारी जिला प्रशासन के संग समन्वय बनाके ए समस्या मन के निराकरण के प्रयास करव अऊ राज्य सरकार के कल्याणकारी योजना मन के लाभ जादा ले जादा मनखे मन तक पहुंचाए म मदद करव। कहूं पुलिस जवान गांव के कोनो एक मनखे के इलाज मुख्यमंत्री सहायता कोष के मदद ले कराथें त मनखे के परिवार के संग पूरा गांव के विश्वास पुलिस के संग होही।